Neys vom Daag

Wow! Unsere Roger Sigrist (friener Stamm- und hit Schwelger-Dambuur und langjäärige Glyggekinschtler) het die ney Fasnachts-Blaggedde '09 kreiert und "laggiert". Häärzligi Gratulation!

Mit däm erfrailige Yydraag schliesst s Joor 2008. Mer wintsche-n-e gute Rutsch und e-n-erfolgryych ney Joor!

Dr Goschdymstoff isch baraat. Me kaa sy Bindel samt Naiaalaitig ab sofort im Käller abhoole (d.h. moorn am Wiehnachtsässe-n-oder denn frieschtens am eerschte Mittwuch im neye Joor).

Unseri baide-n-unermiedlige-n-Inschdruggdoore laade-n-yy zer e-n-aimoolige, ganz spezielle "Drummeli-Vorberaitigsstund" am 3.  Dezämber. Jetz simmer nadyyrlig gspanne, was doo uff uns zue kunnt ...

Geschtert hämmer dr Zugchef und dr Tamburmajor fir d Fasnacht '09 gwäählt: Mer gratuliere im Michi und Niggi zer glanzvolle Wiiderwaal.

Und nadyyrlig hämmer uns noo Beguetachtig vom Goschdym-Prototyp au de Details vom Sujet gwidmet. S Ergääbnis vo langer, mee oder weniger ergiibiger Diskussion findet me-n-uff dr Fasnachtssyte im Mitgliiderberyych.

Am Samschtig, 22. Novämber, isch dr Innestadt-Källerabstiieg. Nadyyrlig isch dr Dybli-Käller au wiider drbyy und het ab de siibeni zoobe-n-offe. Bitte verdailet dr Flyer und bringet alli Frinde, Bekante-n-und Verwandte mit.

S Event-Team laadet wiider yy zem traditionell Wiehnachtsässe uff dr Mittwuch, 17. Dezemäber. Bitte bis speetischtens am 3. Dezämber mit em Talon aamälde.

Am letschte Mittwuch het s eerschti Informatione zem Sujet '09 gää, mit Huusuffgoobe fir alli bis zer Sujet-GV am 19. Novämber. Die, wo s verbasst hänn, kenne-n-im Mitgliiderberyych alles noochelääse. S loont sich ainewääg, deert perioodisch yynezluege, wenn als wiider e ney Detail zer Organisation bekannt wird oder epper die aggduell Dailnäämerlyschte bruucht.

Am Mittwuch, 12. Novämber, kunnt e Delegation vom Comité in d Iebigsstund unsere Drummeli-Uffdritt ko aaluege. Me drifft sich drum scho pingtligg am 19:45h und bitte kaini Absänze ...

Dr Aamäldigstermyyn fir d Fasnacht '09 isch zwoor umme, s git aber no zwai/drey(-ezwanzig !!!) Nooziigler, wo sich bitte sofort bim Obmaa dien mälde. Alli organisadoorische Details (inkl. jeewyls aggdueller Aamäldelyschte) findet me wie immer uff dr Fasnachtssytte im Mitgliiderberyych.

Ab sofort kaa me sich fir dr Lotto-Match am 13./14. Novämber yyschryybe. Am beschte per Doodle (dr Lingg isch via Email verschiggt woorde) oder diräggt bi dr Sonja. S isch Eeresach, ass jeede kunnt oder sich weenigschtens mit eme guete Grund duet abmälde.

Und au fir s Iebigsweekend vom 8./9. Novämber isch jetz d Aamäldig erwintscht, me waiss jo jetz scho wie: per Doodle (dr Lingg isch via Email verschiggt woorde) oder diräggt bi dr Sonja. Fir d Pfyffer und Dambuure-n-isch s obligadoorsich.

Dr Webmaster mecht sich bi alle-n-entschuldige, wo wäägem kiirzlig doo unde publizierte-n-Usswändig-Termyyn fir dr Drummeli-Marsch in s Schwitze sinn koo: Eerscht im Weekend (8./9. Novämber) sinn definidyyv kai Noote me erlaubt. Nadyyrlig isch s aber nit verbotte, dr Marsch scho vorhär usswändig z pfyyffe-n-und z drummle ...

Unseri Jungi Garde laadet die ganzi Glygge (Alti, Schwelger, Stamm) yy zem Brunch im Dybli-Käller am Sunntig, 19. Oggdoober, ab de elfi demoorge, damit me sich uff die näggscht Fasnacht aane e weeneli besser leert kenne. S isch Eeresach, ass e jeede kunnt. Aamäldige sinn erbätte bis zem 30. Septämber bi dr Obfrau vo dr Junge Garde.

Im Hiibligg uff s Drummeli 2009 sinn e baar Bsunderhaite zem Iebigsbedriib z beachte:

Achtung! Uff em Flyer fir s Iebigs- und Sujet-Weekend vo dr Junge Garde het dr Fäälerdeyfel zuegschlaage. Dr Dräffpunggt isch nadyyrlig nit eerscht am Samschtig sondern scho am Fryttig ...

Dräffpunggt: Fryttig, 15. Auguscht, 17:10 in dr Schalterhalle vom Bahnhof SBB.

Dr Summerevent im Sunnebeedli am 6. Auguscht muess uss gsundhaitlige Grind vom OK laider abgsait wäärde. Me gseet sich drum eerscht wiider am 13. Auguscht in dr Iebigsstund im Schuelhuus. Mer wintsche-n-alle noo-n-e scheene Räscht vo de Summerfeerie.

D Veloduur, wo fir dr 23. Juli wär vorgsee gsii, wird ney um e Wuche-n-uff dr 16. Juli voorverschoobe (am 23. isch drum s eerscht FCB-Haimspiil und erfaarigsgmäss sinn e Huffe velofaarendi Dybli au fuessballerisch engagiert). Dräffpunggt isch immer no am halber siibeni bim Leonhardschuelhuus. Me nimmt nit numme s Velo, sondern au eppis zem Grilliere mit.

S Sujetteam suecht Vorschleeg fir s Sujet 2009. Me kaa Idee-n-ab sofort im neye Sujetobmaa Kasper per Email oder SMS schigge. Yysändeschluss isch dr 18. Auguscht.

Moorn zoobe duet dr Vordraab alli Pfyffer und Dambuure mit eme "kulinarische Füürwärk im Käller" willkomme haisse. S git verschiideni vegedaarischi und carnivoorischi Variante fir numme fimf Stai, bringet also alli Hunger und e Schnägg mit. Voorreservatione zwäggs Yykaufskoordination sinn z rischte an Niggi per Email oder SMS.

Mer hänn scho erfolgryycheri Joor gsee, s isch uns eppe glyych gange wie dr Schwyzer Nati an dr EM: Fertig noo dr Vorrundi ;-). Mee (inkl. Fottene) wird s bald im Archyyv gää.

Drotz EM'08 etc. git s am näggschte Wuchenänd au no richtigs Schutte (mit hoffentlig richtigem Bier), nämmlig am draditionelle Glygge-Grimpeli, wo mir Basler Dybli wiider im Yysatz steen. Am Samschtig (14.6.) spiile die gmischte Friidensdybli ab em halber zwai, am Sunntig (15.6.) steen d Samba Dybli in dr Kategoryy Schutter ab em nyyni demoorge-n-uff em Fäld.

Dräffpunggt zem Yylauffe-n-isch als speetischtens e halb Stund vor em Aapfiff. Wemmer wytter kemme, drnoo goot s fir baidi Kategoryye-n-am Sunntig ab de zwelfi in d Zwischerundi. S Reglemänt und sämmtligi Aaspiilzytte findet me doo uff dr Grimpeli-Homepage.

Am 11. und 15. Juni 2008 findet z Basel e EM-Matsch statt. Dr Zuegang zem Schuelhuus isch denn nit numme mentaal (me mecht jo allefalls dr Matsch sälber go luege) sondern au physikaalisch (s faare kaini Drämmli duur d Innestadt) erschwäärt, drumm lemmer d Stunde von dr Junge Garde und vom Stamm uusnaamswyys lo sause.

An dr GV isch au s ney Källerdienscht-Syschteem vorgstellt (e jeede stoot mindeschtens aimool amme-n-intärne-n-Aaloss und an ere Vermietig im Yysatz) und e neyi Källerdienscht-Lyschte (giltig ab 9. Juni) uffgleggt woorde. Wär sich nooni yydrait het, kaa das online noochehoole-n-oder mäldet sich bi dr Susy (fir Vermietige) bzw. bim Thömi (fir intärni Aaloss).

Am Fryttig hämmer die 26. ord. Generalversammlig erfolgryych abghalte. D Aadrääg sinn alli aagnoo woorde-n-und im Vorstand deerfe mer zwai neyi Gsichter begriesse:

An Stell vo dr langjäärige Kassiererin Sandy isch ney d Claudia Schneider verantwoortlig fir unseri Finanze. Und bim Vordrab het dr Niggi Ballmer s Szepter vo dr scho syt Uurzytte aggdyyve Conny iibernoo. De-n-Abdräddende dangge mer härzlig fir dr Yysatz und de Neye wintsche mer vyyl Erfolg.

Wääge dr Schuelsynoode blybt s Leonhardschuelhuus am näggschte Mittwuch (23.4.) zue. Fir alli vo dr JG und fir d Pfyffer vom Stamm falle drumm d Iebigsstund uus. Ainzig unser unermiedlig Stamm-Dambuureninschdruggdr losst nit lugg und bietet d Stamm-Dambuure-n-uff in Dybli-Käller (19:00 Aafänger, 20:00 Spiil). E jeede muess sälber sy Beggli mitbringe.

Am iibernäggschte Mittwuch (30.4.) vor Uffaart hänn denn definidyyv alli frey.

Hesch au scho vor luter "scht" und "schp" kuum me verstande, was eppis aigedlig haisst? Drumm hämmer imme-n-Aafall vo Suterisierig s Baseldytsch doo uff dr Homepage däm Standardwäärgg mee oder weeniger aabasst. "Scht" und "schp" wäärde numme no uusgschriibe, wenn s im Dialäggt au wiirgglig als "scht" uusgsproche wird, im Hoochdytsch aber als "st", z.B. isch e Hoochdytsches "Fest" e baseldytsch "Fescht", dr "Stamm" isch und blybt aber ney eebe-n-au uff Baseldytsch dr "Stamm". S git e baar Uusnaame, wo mer – v.a. bi de Doppelvokaal – vom Suter abwyyche, wil me sich gwissi Weerter aifach esoo gwennt isch: Basel, Fasnacht Jungi/Alti Garde etc., do gseet s mit em Doppel-A aifach glunge-n-uss ...

Ändlig sinn au d Fottene und e baar Filmli vom Stamm-Bummel uffgschalte. Als Neyigkait git s jetz zem eerschte Mool e bsundere Album-Dail, wo numme fir d Mitgliider isch (mer wänn die allze "pyynlige" Sache jo nit dr ganze Wält zaige ;-). Wär s Passwort nit waiss, kaa bim Webmaster noochefrooge – nadyyrlig wird s numme-n-an d Mitgliider (au Jungi, Schwelger, Alti und d Passyvmitgliider) uusegää.

Mer fraie-n-uns uff d Sarah bi de Pfyffer, uff d Christel und dr Max bim Vordraab und bi de Dambuure-n-uff unsere Ruggkeerer Robin und dr Tobias vo dr JG. Häärzlig Willkomme!

Scho glyy geemmer am 11. April wiider uff Ziiri go s Niiderdeerfli unsicher mache ... Doo isch d Yylaadig (PDF) fir s Trummlebummle mit alle Detail: Abfaart isch am 17:00h in dr Gaartestrooss, Keschte 40.– Frangge, bitte bis speetischtens am 2. April (Pfyffersitzig/1. Drummelstund) bim Tom oder dr Eveline aamälde.

An dr Lämpesitzig geschtert zoobe hämmer au s Jooresprogramm bis zer näggschte Fasnacht zämmegstellt und e Huffe wichtigi Termyyn feschtglait. Bitte dien Eych die schoo-n-emool alli sofort in dr Agända aastryyche, ganz bsunders d Generalversammlig am 6. Juni und s Drummeli-/Iebigs-Weekend am 8./.9. Novämber.

Die Jungi Garde het e wunderscheene Bummel uff Langebrugg zer Roodelbaan gmacht. Nadyyrlig hämmer au doodrzue im Archyyv e baar Fottene.

Joo, jetz isch es scho wiider verbyy mit em Fasnachts-Drämmli 2008. Bi scheenschtem Wätter hämmer mit e baar Verbesserige (neys Design, optimierti Ussebeschte) e Huffe glaini Buebe-n-und Maitli kenne mit em Piccolo und de Drummelschleegel verdraut mache. Nadyyrlig git s im Archyyv au e baar fotograafischi Impressione.

Am Samschtig, 23. Hoornig, faart jetz scho zem vierte Mool s Basler Dybli Fasnachts-Drämmli dur d Innestadt (Schiffländi – Märtblatz – Barfi und zrugg, ab de-n-Ains bis am Finfi zmidaag). Kemmet uns ko bsueche und bringet alli Frinde, Verwandti, Bekannti und nadyyrlig alli, wo sich fir s Fasnacht-Mache intressiere, mit.

Und scho am Sunntig noo-n-em Drämmli goot die Jungi Garde-n-uff e Bummel. Ab de Siibeni zoobe kaa me si denn gsee, wie si stolz die Frey Strooss durabb gässle. Und fir d Glygge-n-und die Aagheerige mache mer aaschliessend au dr Käller uff fir e gmietlig Uusplämperle ...

Ändlig goot s los! Wie immer git s im Archyyv d Zeedel vo de Junge-n-und vom Stamm und au e Huffe Fottene zem Aaluege (mit mee ooder weeniger däägligem Update).

Dr ney Rädäbäng isch dusse. D Yydrääg vo de Basler Dybli kaa me-n-im Archyyv noochelääse.

S Fasnachtsprogramm vom Stamm isch underdesse uffgschalte. D Programm vo dr Junge Garde und vo de Schwelger findet me zämme mit dr Dybli-Zyttig in de näggschte Daag im Briefkaschte.

D Aggtion "Last-Minute-Schnupperfasnacht" vo dr Junge Garde-n-isch e tolle-n-Erfolg woorde: Mer deerfe-n-an dr Fasnacht grad 11 neyi jungi Fasnächtlerinne-n-und Fasnächtler begriesse. Häärzlig willkomme!

Wie all Joor isch dr Dybli-Käller an dr Fasnacht fir alli offe. Details mit de-n-Effnigszytte-n-und em Aagebott git s uff dr Käller-Sytte und uff em Flyer, wo me sälbverständlig au wytter verdaile daarf.

D Laarve sinn fertig und kenne zämme mit de perseenlige Reggwisytte-n-im Käller abghoolt wäärde. Termyyn und Details findet me wie immer im Mitgliiderberyych.

Sosoo, d Minggestainer verdraage kaini Marschiebige me, zmindescht kaini in dr Grien 80 ab de-n-achti zoobe ... Doorum sinn d Stamm-Marschiebige an de Mittwuch halt im Eglisee (16., 23. und 30.1.).

Die strängi Inschdruggdooreschaft het drzue e detailliert Programm erlosse, wo me vorzugswyys vorhär duet behäärzige.

Mr wintsche-n-alle e guets Neys und fraie-n-uns uff e super 2008, wo jo scho zimmlig glyy mit dr Fasnacht loggt. Aber zeerscht kunnt nadyyrlig d ...

Nit vergässe, am Samschtig kunnt die ney Blaggedde. D Uusgoob isch wie allewyl im Käller, vom zääni bis am zwai. Wär nooni bstellt het, kaa das no bis am Fryttig Mittag noochehoole (Stamm: bi dr Claudia, JG: bi dr Sibylle).

Am glyyche Samschtig moole d Frischling iir Kopfladäärnli und s Sujet-Team isch am baschtle. Wär Zyt het, isch häärzlig yyglaade zem mithälfe.

Und naddyrlig duet e jeede d Termyyn vo de Marschiebige root aastryyche in dr ney Agända: 16./23./30. Jänner (jee Mittwuch, 20:00h, Joggeli-Parggblatz) und die Gmainsami am Sunntig, 27. Jänner (10:00h) im Hardwald. Dailnaam isch obligadoorisch.