|
Neymitgliider kemme normaalerwyys ze uns in s Fasnachts-Drämmli, damit me sich geegesyttig kaa kenneleere. Hesch s Drämmli verbasst , kaasch Di aber jeederzyt ungeniert bi de jeewyylige-n-Oblyt mälde. Alli Details findsch doo zer Junge Garde und doo zem Stamm.
S Basler Dybli Fasnachts-Drämmli isch unsere Glygge-Aaloss, wo die Jungi Garde und au dr Stamm mechte Neymitgliider aawäärbe. Jeewyls am Samschtig, e Wuche noo dr "1. Lektion" vom Fasnachts-Comité, wämmer d Nooziigler aaspräche-n-und nadyyrlig au zyylt fir uns Basler Dybli wäärbe.
Wie alles z Basel, wo s mee als aimool git: Au s Basler Dybli Fasnachts-Drämmli isch underdesse-n-e Dradition, wo ze unserem Fasnachts- und Glyggelääbe gheert und wo nit numme Wäärbig fir Neyi soll syy, sondern au e Dräffpunggt und gsellige-n-Aaloss isch fir unseri Mitgliider und Frinde/Verwandti und Bekannti. Und denn gniesse mer nadyyrlig au dr Nyyd vo de-n-andere Glygge, wenn s wiider emool haisst: "Sinn iir die mit em Drämmli?"
Mechtsch scho-n-emool luege, wie s in de letschte Joor gsii isch, drnoo findsch linggs ussfierligi Ruggbligg.
|
