Unseri Zyttig - s' Dybli

D Dybli-Zyttig (oder au liebevoll s' Dybli gnennt) isch unseri Verainszyttig. Si erschyynt drey Mool im Joor (Fasnacht, Summer, Heerbscht) und das syt 1985. Si brichtet iiber alles, was in unserer Glygge-n-e so lauffe duet. Das isch sicher emool s aggduell Jooresprogramm, aber au Erlääbnisbricht vo Glygge-Aggdividääte, Aamäldige fir kinftigi Aaläss, dr Zivyylstandsklatsch und d Verzaichnis vo unsere Genner und Passyvmitgliider. Jeedi Uusgoob het e-n-Ufflaag vo ca. 200 Stigg.

Wenn Du eppis zem Inhalt vo däre Zyttig mechtsch byydraage, denn frait sich d Redaggtion seer driiber. Dr Täggscht hänn mir am Liebschte-n-in digidaaler Form. D Sytte sälber gstaltet sich esoo:

Rand (linggs, rächts, oobe-n-und unde): 2 cm
Schrifttyp: Arial
Titel: 18 Punggt
Täggscht: 13 Punggt

Fir Inseränte hänn mir folgendi Konditione vorgsee: Si liifere-n-uns e druggfertigi schwaarz-wyss A4-Vorlaag (uff Babyyr oder als PDF). E ganzi Sytte koschtet CHF 100.-, e halbi CHF 50.- (fir jewyyls 3 Uusgoobe). S Gäld kenne Si uff unser Poschtkonto iiberwyyse (Basler-Dybli Clique Basel, PC 40-33920-9, Vermergg: Glygge-Zyttig).

Fir Frooge bedräffend Inserat und fir Aareegige, Byydrääg oder sunschtige-n-Aaliige stoot unsere Redaggdr Dominik Schneider gärn zer Verfiegig.