Home

Neys vom Daag

Mitdailige us em Joor 2014

aggdualisiert
31.12.2014
Yylaadig in Zolli 29.05.2014  

D Schwelger und die Alti Garde laaden uns am Sunntig, 22. Juni, zer e Fierig in Zolli yy. Me drifft sich am drey zmidaag vor em Affehuus. Aaschliessend git s nadyyrlig au en Apéro. Aamälde muess me sich bis am 13. Juni per Doodle.

Scho jetz e häärzlig Danggscheen an unseri Schwelger und Alte!

E ney Eeremitgliid 26.05.2014  

An dr GV hämmer noon e bsundere Beschluss gfasst: Dr Willy Grüninger isch unser ney Eeremitgliid! Är isch s letscht immer noo aggdyyve Dybli, wo scho an dr aller eerschte Dybli-Fasnacht im 1965 drbyy isch gsii. Das sind underdessen also 50 Fasnachte! Vom Hans Räber het är sällmool dr Dambuurmajoorsstäggen iibernoo und die Alti Garde vyyli Joor dirigiert.

Mer hoffe, dr Willy no vyyli wyteri Joor an dr Fasnacht z gsee, und fraien uns au immer, wenn är uns an unseren Aaloss oder im Käller kunnt ko bsueche.

Bricht vo dr GV 26.05.2014  

Mer gratuliere dr Jenny Hüppi zer Waal als neyi Obfrau vo dr Junge Garde. Si wiird mit em neye JG-Kassier Patrick Bischoff und ney mit Hilf us de Stamm-Teams die erfolgryych Aarbet vo iire Vorgänger wytter fiere.

Und us histoorischer Sicht kenne mer vermälde, ass dr obligaat Aadraag uf e Standarte s au no meerjääriger Pause immer no nit gschafft het...

Drfir sind alli meeglige Lyschte (Kaländer, Mitgliider und Källerdienscht) uf em neyschte Stand. No nit uffgschalten isch die ney Teamlyschte, die muess zeerscht no vervollständigt und erfasst wäärde.

Källerdienscht 20.05.2014  

Ändlig isch die allsyts beliebti neyi Källerdienschtlyschte verfiegbar. Laider isch si no zimmlig läär, si frait sich aber uf reegs Yyschryyben am näggschte Mittwuch und an dr GV.

Spiilsitzigen und Neymitgliider 08.05.2014  

Geschtert händ d Pfyffer und d Dambuure die ney Saison besproche. Dr Aeschlemer hämmer us em Répértoire kyppt und drfir Aupres de ma Blonde uffgnoo, wo au unsere näggschte Drummeli-Maarsch isch. D Spiilcheffen und iiri Stellverdrätter sind alli bestätigt woorde.

Und mer händ e Hampfle neyi Pfyffer deerffe begriesse: E häärzlig Willkommen an d Selina vo dr Junge Garde und an d Eri, d Ines, d Melanie, d Vanessa und dr Patrick.

Generalversammlig 06.05.2014  

Die 32. ord. Generalversammlig findet am 23. Mai 2014 im Dybli-Käller statt. D Yylaadig und andery Underlaage findet me doo.

Bummel & Bummel 21.03.2014  

Am zwaite Sunntig goot die Jungi Garden uf e Bummel. Mir vom Stamm kenne si zooben eppen um die siibeni in dr Freye Stroos bewundere.

Dr Stamm isch denn am dritte Sunntig draa: Dräffpunggt isch am viertel vor nyyni uf em Peetis. Wämm das no nit (z)frie gnueg isch, soll draa dängge, ass an sällem Daag d Uuren uf Summerzyt umgstellt wäärde. Me deerf also ruig noon e Stund friener uffstoo... Au dr Stamm wird denn um die siibeni zooben in dr Freye Stroos aazdrääfe syy.

Erschti Lektion: Mechtscht au e Dybli wäärde? 13.03.2014  

Noo dr Fasnacht goot s au scho grad wiider wyter. S Basler Dybli Fasnachts-Drämmli faart hyyr zwor nit, die Jung Garden isch drfir am Frytig und Samschtig prominänt an dr erschte Lektion uf em Barfi presänt. Deert kaa me sich grindlig informieren und sich allefalls au scho grad aamälde. Wär das verbasst, kaa sich au uf dr Hompeage vo dr Junge Garden informiere.

Und wär sich fir s Mitmachen im Stammverain interessiert, findet doo alli Aagoobe oder kaa sich au ungeniert aifach emool bim Obmaa mälde.

Aadie Fasnacht 13.03.2014  

Dr Petrus isch allem Aaschyyn aa en Eere-Jubilääum-Dybli. S isch aifach wunderscheen gsii. Sogaar dr grooss Stau am Mittwuch uf dr Wettstaibrugg hämmer in de "weermschte" Ziig gnosse...

Underdesse hämmer au vo alle drey Dääg e Huffe Fottene zem noon e bitz in Erinnerige z schwelge.

Glyy goot s loos! 08.03.2014  

S isch (fascht) alles baraat und allem Aaschyyn aa spiilt s Wätter mit: Mr fraien uns uf e wunderscheeni Jubel-Fasnacht 2014!

Wie allewyyl kaa me d Dybli an dr Fasnacht online beglaite mit der aggduelle Brichterstattig mit d Rädäbäng-Yydrääg, de Zeedel und nadyyrlig e Huffe Fottene.

Dybli-Käller an dr Fasnacht 02.03.2014  

Nadyyrlig isch dr Dybli-Käller au an dr Fasnacht 2014 fir alli offe! Details findet men uf dr Käller-Syte.

Fasnachtsprogramm 01.03.2014  

Ändlig isch s neye Fasnachtsprogramm vom Stamm online. Mer händ s bim Zytigsversand vergässe mitzschigge. An dr Yydringgedde und bim Yypfyffe liige die praggtische glaine Progrämmli denn au no uff.

Schuelfasnachtsziigli in Aarlese 01.03.2014  

Am Daag noon em Drummli-Uffdritt isch e Detachement Dybli au no grad uf Aarlese an d Schuelfasnacht. Deert hämmer im Ziigli vo dr GSR Wielandschuel mitgmacht. Ändlig wiider emool e Gläägerhait, das zwor scheenen aber voorbelaschtete Goschdym aazleege... Aber lueg sälber.

Jubel-Uffdritt am Drummeli 28.02.2014  

Am Donnschtig hämmer unsere groosse Drummeli-Daag ghaa. Alli Dybli sind gmainsam uf d Biini gstanden und händ s Dybli uffgfiert. E jeedes het an Zuugsgoschdym us de friener Joor aaghaa, das het e wunderscheene faarbebrächtige Huffe gää. Denn het s Pia Inderbizin vom Comité e baar nätti Väärsli uffgsait und zem Schluss em Damburmajoor e Maiie wellen iibergää. Doch dää isch schnäller gsii ...

Und nadyyrlig hämmer dangg em Däni und em Flo au e baar Fottene vo unserem Uffdritt (d Filmli sind no in Beaarbaitig und kemme speeter).

Rädäbäng 23.02.2014  

Dr Rädäbäng isch duss! Jetz sind unseri Sujets entlaarvt, und zwor ganz ooni Fasnachtsleaks, wo s nit gschafft het, d Basler Dybli z hägge.

Me kaa dr Rädäbäng offebaar nimm an de Kiosk kauffe, sondern numme no im Sutter-Begg, bi dr BVB, bi dr Pro Innestadt und bim Comité. Und unseri Yydrääg sinn nadyyrlig au scho uf unserer Homepage.

Drummeli 22.02.2014  

S Drummeli 2014 het hit Première. Und mir Basler-Dybli händ e Jubilääums-Gaschtuffdritt, nämmlig am Donschtig, 27. Hoornig, ca. am fimf vor halber nyyni. Alli Details zer Hauptbroob und zem Uffdritt findet men im Info-Blatt.

Superstars! 01.02.2014  

S Offizielle 2014 isch mit ere Dybli-Rekordbedailigung gstaartet und het mit ere Dybli-Rekordbedailigung in de Finääl gändet: Ganz häärzligi Gratulatioon an die jungi gmischti Grubbe, wo souverään dr eerscht Blatz abgruumt het, und an die jungi Pfyffer-Grubbe, wo sendsaitionell Dritti isch woorde! In den Ainzel-Finääl händs d Jlena bi de Jungen uf e nyynt und d Marina bi den Alte – drotz eme beduurligen Uussetzer – uf e zäänt Rang gschafft. Au doo e riisen Applaus.

Und fir alli, wo noonemool mechten in Erinnerige schwelge: Doo sinn Fottene und glaini Filmi baraat!

Blaggedde-Bstellige bi dr Junge Garde 24.01.2014  

Offebaar hämmer e glaini Wirrledde mit den eleggdroonische Blaggedde-Bstellige. Ab sofort gilt: Emails an blaggedde@basler-dybli.ch bstelle bim Stamm und Emails an jg-blaggedde@basler-dybli.ch bi dr Junge Garde.

Alles glaar? Denn flyssig wytter bstellen und verkauffe...

Dybli am Offizielle 14.01.2014  

Noo de sensationellen Erfolg vo unsere Jungen in de letschte Joor wooge sich jetz au wiider emool Stamm-Dybli ans Offizielle! Underdesse sinn d Staartnummere zoogen und d Uffdritt an dr Vooruusschaidig bekannt:

   Do, 30.01., 18:00 (Wettstaisaal)  Jlena (JG Pfyffer ainzel, Staartnummere 401)
Do, 30.01., 21:15 (Merian-Saal)  Marina (Alti Pfyffer ainzel, Staartnummere 528)
Do, 30.01., 23:55 (Groosse Saal)  Jlena & Jüggi (Solo Duo, Staartnummere 957)
Fr, 31.01., 18:45 (Merian-Saal)  Jungi Pfyffer (Jungi Pfyffer Grubbe, Staartnummere 710)
Fr, 31.01., 21:20 (Merian-Saal)  Stammpfyffer (Alti Pfyffer Grubbe, Staartnummere 755)
Mr wintschen alle vyyl Erfolg!

Last Minute Fasnacht 21.01.2014  

Unseri Jungi Garde bietet kuurzentschlossene Maitli und Bueben ab siibe Joor d Meegligkait, an dr Fasnacht '14 mitzmache. Alli Details und Aamäldemeegligkaite findet men uff Bueche – Pagge – Vorwärts Marsch! Dr Aamäldeschluss isch am 16. Hoornig 2014.