Neys vom Daag

Ab sofort kaa me wiider Blaggedde bstelle bi dr Sonja. D Blaggeddenuusgoob isch am Samschtig, 9. Jänner, vom zääni bis am zwelfi im Käller. Speeteri Bstellige wäärde jeewyls am Mittwuch druff uusgliiferet. D Bryyse sinn schynts glyych wie letscht Joor (Kupfer 8.–, Silber 15.–, Gold 45.–, Bijou 100.–). Und nit vergässe: Fir jeedi verkaufti Blaggedde goot e Dail diräggt in d Glyggekasse, mer fiere drumm wiider unseri bewäärti Ranglyschte ...

Mer mache doo no uff e baar wichtigi Termyyn uffmerggsam (lueg au im Kaländer):

Im Mitgliiderberyych kaa me jetz wiider die aggduell Källerdienschtlyschte (20.04.2009 - 21.03.2010) als PDF aabelaade. D Online-Versioon samt alle Statistigge sott au glyy uffgschalte wäärde.

Uss diväärse Grind isch d Homepage in de letsche Wuche nit ganz esoo reegelmässig aggdualisiert woorde. Jetz got s aber wiider vorwärts und me kaa schoo-n-emool dr ney Kaländer und e-n-aggduälli Adrässlyschte aaluege-n-und als PDF au aabelaade. Die andere Rubrigge sotte noodisnoo au uffgfrischt wäärde.

Moorn zoobe hämmer mit em Yussuf und em Mustaffa zwai Star-Kech us em Moorgeland z Bsuech im Käller. Sie wäärde-n-uns mit oriendaalische Spezialidääte-n-in feschter (Falafel) und flissiger Form (Minze-Tee) verweene. Zer Blaanig vom erwaartete-n-Aasturm vo alle kulinaarisch intressierte Dybli wird um Voraamäldig bi iirne hiisige Agänte Dominik oder Claude bätte.

Noo diväärse Jooresbricht und Rächnigsgnäämigunge, noo vyyle Mitgliidermutationsmäldige-n-und noo dr glanzvolle Wiiderwaal vom Vorstand simmer ändlig zue de GV-Aadrääg koo. Doo het sich denn zaigt, ass d Glygge d Luscht am Strytte an dr Politigg nooni verloore-n-und jeede-n-Aadrag aagreggt dischbediert het. Mer mien drbyy konstatiere, ass sowool d Aadragsteller wie au dr Vorstand hänn miesse Fäädere losse (d Detail drzue kemme glyy im Protokoll). Dr Abschluss isch de Teams (Yyschryybe nit vergässe) und em Källerdienscht (mit gwisse-n-eerevolle-n-Erwäänige) gwidmet gsii.

An dr GV hänn d Nadja Studer als Obfrau und d Sibylle Roth als Kassier iir Amt in neyi Häng iibergää. Mer wintsche dr neye Laitig vo dr Junge Garde mit dr Corinne Borer als Obfrau (greftig understitzt vo dr Seraina Baumartner) und dr Brigitte Derungs als Kassier vyyl Erfolg.

Nadyyrlig geemmer wiider an s Glygge-Grimpeli am 13./14. Juni. D Samba Dybli (Schutter) und d Friidensdybli (Gmischt) spiile-n-am Sunntig, me drifft sich am halber nyyni zem Yylauffe, dr eerscht Matsch wiird punggt nyyni aapfiffe.

Und wär jetz entdyscht isch, will am Samschtig schynts nyt loos syg, het sich schwär dosche: Zem eerschte Mool isch e Team vo unserer Junge Garde-n-im Yysatz (under dr Laitig vo unserem Noowuggs-Coach Claude). Die dräffe sich am Samschtig am Viertel vor ains, und fraie sich uff groossi Unterstitzig vom Stamm als zwelfte Maa. Wenn si wytter kemme, goot s am Sunntig zmidaag in dr Zwischerundi wytter.

Fir alli git s am Sunntig vorhär (7. Juni) e Trainigsainhait under dr Laitig vom Chef-Coach Dominik. Är wird Zyt, Ort und Bedarf noo Grill-Utensilie (fir s Mentaal-Training) speeter bekannt gää. Me drifft sich am ains zmidaag uff em Joggeli-Parggblatz am Egge zer Yyshalle. Falls es allze stargg sott räägne, kamme-n-uff dr Schlächtwätterhotline bim Dominik noofroge.

Nit vergässe! Am 5. Juni isch d GV! Dr Käller isch ab de siibeni offe, dr offiziell Daill foot am achti aa. Alli Details findet me-n-uff dr Yylaadig. Aggdyvmitgliider, wo nit kenne koo, mäldee sich bim Obmaa ab. Nadyyrlig fraie mer uns au alli uff e Huffe Aadrääg, wo me bis speetischtens am 29. Mai im Obmaa zueschigge muess.

Noo de Pfyffer- & Dambuuresitzige kenne mer dr Patricia und dr Saskia zer Neywahl als Pfyffercheffinne gratuliere. Bi de Dambuure sitzt s bewäährt Duo Jüggi und Stephan noo wie voor fescht im Sattel.

An de baide Sitzige hämmer au diväärsi Neymitgliider deerfe begriesse: Bi de Pfyffer kemme d Roswitha vo dr Junge Garde-n-und d Luzia und Pina vo extärn drzue. Bi de Dambuure het sich dr Benedict wiider zrugg gmäldet.

Ganz bsunders frait ys au, ass sich bi dr Junge Garde grad nyyn neyi Pfyffer und fimf neyi Dambuure yygschriibe hänn.

E häärzlig Willkomme-n-an alli neye Dybli!

Wääge dr Schuelsynoode-n-und vor Uffaart blybt s Leonhardschuelhuus am 6. und am 20. Mai zoobe zue und d Iebigsstunde falle fir die Jungi Garde und dr Stamm uus. Allefalls git s noone-n-Alternadyyvprogramm und suntscht kamme die Zyt jo vorzuugswyys zem Iebe bruuche.

S Comité fyyrt näggscht Joor sy 100schte. Doorum isch dr Yysändeschluss fir Entwiirf zer Jubilääums-Blaggedde vorverleggt und zwor uff dr 1. Juni. Wär sich also bedailige mecht – s wär dr Hammer, wenn wiider e Dybli zem Zuug kääm – muess sich also spute. Uff dr Comité-Homepage git s alli Details.

Noo vyyle Joor isch geschtert wiider emool e Lämpesitzig gsii, wo dä Namme verdient het. D Emotioone, wo uusbroche sinn, hänn dr aint oder die ander sicher verschreggt. Aber villicht git grad das e jeedem – und vor allem au dääne, wo s Gwitter nit hänn gsee koo oder sich nit bewuust sinn gsii, ass si sälber zmitts drinn stegge – e Dänggaastooss zer Sälbschtreflexion. Und uff soo-n-ere Basis wäärde mer au dää Stuurm reschpäggtvoll maischtere-n-und emänd gsteerggt in s neye Glyggejoor staarte.

Noo de-n-Ooschterfeerie goot scho wiider los: Am 22.4. hänn d Pfyffer iiri Sitzig und d Dambuure die eerschti Iebigsstund. D Wuche druff isch s denn am 29.4. grad umgekeert: D Dambuure dräffe sich im Käller und d Pfyffer geen pinggtlig in s Schuelhuus. D Detail sinn alli im Kaländer.

Drotz em gsellschaftlig-spoortlig seer aaspruchsvolle Programm hämmer in Soleduurn e scheene Bummel ghaa. Dr Fottigraaph isch zwoor nee-n-e bitz usser Ootem und laboriert am Musggelkaater (är isch doo glaub nit dr ainzig), d Fottene sinn aber scho im Fottialbum.

S findet wiider statt und nadyyrlig sinn d Dybli au drbyy: S Trummlebummle in Ziiri am 17. April 2009. Aamälde kaa me sich am Bummel und speetischtens an dr Lämpesitzig bim Event-Team (bitte grad dr Raisekeschte-Byydraag vo 40.– Stai baraat halte).

Die Junge sinn hit uff em Bummel gsii bi – im Verglyych zer Fasnacht – sensationellem Wätter. D Rais isch in s Trampolino gange, wo sich Glai und dailwyys au Grooss het kenne-n-uustoobe. Zoobe simmer in Dybli-Käller go Spaghetti ässe-n-und nochär e letscht Mool ab uff d Gass.

Bildli git s nadyyrlig im Fottialbum.

Scho isch es wiider verbyy, s fimfte Basler Dybli Fasnachts-Drämmli. S het vom Aafang bis am Schluss e reegelrächti Druggedde ghaa und mer wisse gar no nit gnau, wievyyl Mailtli und Buebe mitgfaare sinn. Eerschti Bildli git s im Fottialbum und au s Telebasel het im 7vo7 driiber brichtet ghaa.

Am 14. Meerz vom ains bis am fimfi zmidaag goot s Fasnachts-Drämmli zem fimft Mool uff Tour. Alli Detail findet me nadyyrlig uff dr Drämmli-Syte. Styyget alli yy und bringet Eyri Frinde, Verwandte-n-nd Bekannte mit.

Noo-n-em Fasnachts-Drämmli geen d Mitfaarer draditionell in Dybli-Käller go Znacht ässe. Dissjoor kunnt am glyyche-n-Oobe-n-au no grad dr Fasnachts-Gweerschnitt im Schwyzer Fäärnsee. Das isch e glungeni Kombinatioon, wo me nit deerf verbasse ...

Am Mittwuch zoobe-n-isch in dr Sändig "Schwyz Aggduell" dr Bricht iiber unseri Last-Minute-Fasnächtler gsändet woorde. Doo kaa me dä Bricht noonemool aaluge-n-und gniesse.

D Fasnacht '09 isch laider scho wiider umme. Mer hänn e meteoroloogisch, musikaalisch und emotionaal Wäggselbaad erläbbt. Aber es sinn jo grad eebe soonigi Elemänt, wo die scheenschte drey Dääg so intensyyv und scheen mache. Im Archyyv kenne dr Stamm und die Jungi Garde noo e weeneli in Erinnerige-n-und – im Momänt no ungoordnete – Fottene "schwelge" (Schwelger und Alti Garde kemme hoffentlig speeter au drzue).

Jetz mache mer uns an s Uffruumme und fraie-n-uns uff d Uusdringgedde (Fryttig, 6.3.), s Fasnachts-Drämmli (Samschtig 14.3.) und d Bummel vo dr Junge Garde (Sunntig, 15.3) und vom Stamm (Sunntig, 22.3.).

Drotz nit ganz hunder-brozäntig hervoorragende Wätterprognoose hämmer e "drogge" Yypfyffe-n-erläbbt (näggscht Joo nämme mer definidyyv mee Wyy mit ;-) und hoffe, ass es au die näggschte drey Dääg nit allze fescht duet räägne. Mer wintsche-n-uff jeede Fall alle-n-e wunderscheeni Fasnacht '09.

Was d Dybli so alles mache-n-und erlääbe, kaa me jeewyls doo live mitverfolge.

Dangg em Daniel (dä vo dr Corina ;-) hämmer underdesse-n-e baar wunderscheeni Fottene vom Drummeli-Uffdritt im Fottialbum kenne-n-uffschalte. Är het is au e PDF-Version uffberaitet, wo me-n-alles uff ai Dätsch kaa aabelaade. Häärzlige Dangg iim und im Fottigraf Benno Hunziker.

S Drummeli '09 isch umme. E häärzlig Danggscheen an alli, wo mitgmacht hänn und zääme-n-e wunderbaari, intensyyvi Wuche-n-erläbbt hänn. Und e bsundere Dangg goot nadyyrlig an unseri Komponischte: Dr Alain Bürgler, wo s Groovy-Arrangement gschriibe het, dr Nicola Dreier, wo fir dr Bääseli-Täggscht verantwortlig zaichnet, und d Corinne Borer, wo mit de-n-andere zämme d Grundidee uusgheggt het.

Im Archyyv git s drzue s obligaate Fottialbum, nadyyrlig au mit em uusfierlig "Bäggsteytsch"-Beryych. Mer sinn allerdings no uff dr Suechi noo scheene Fottene vom Uffdritt sälber. Wär kennt doo uushälfe? Bitte bim Webmaster mälde.

Ab sofort git s uff dr Käller-Syte alli Aagoobe zem effentlige Bedriib an dr Fasnacht '09. Nadyyrlig git s au wiider e Fasnachts-Flyer zem aabelaade und iiberall uffzhängge.

Jetz, wo sich dr Drummeli-Bedriib langsam yygspiilt het, hämmer unsere Termyynblaan e weeneli kenne straffe. Me drifft sich jetz immer pinggtlig dreyviertel Stund vor em Uffdritt umzooge-n-am Yyspiilort. Details sinn uff em entsprächend aggdualisierte Drummeli-Kaländer.

D Laarve vom Stamm sinn fertig und kenne-n-im Käller abghoolt wäärde. Effnigszytte-n-und Abschlusshiiwyys findet me-n-uff dr Fasnachtssyte im Mitgliiderberyych.

D Stellbroob isch umme, moorn goot s (ändlig) richtig loos. Underdesse wisse mer au, wo mer als yyspiile: Im Sous-sol vo dr Halle 1 (Yygang isch wool wiider am Riechering, wie in de letschte Joor). Wär nit waiss, wo das isch, hänggt sichh im Bungger bi epperem yy.

Ändlig git s wiider emool neye Fottene im Album, und zwor vo dr

–  groosse Marschiebig vo de Junge, vom Stamm und vo dr Alte Garde

–  Drummeli-Iebig in dr Aula (mit Film)

–  Drummeli-Stellbroob uff dr Biini

Vyl Vergniege!

PS: Wär s Basswort fir dr Mitgliiderberyych vom Album vergässe het, mäldet sich bim Webmaster (das gilt nadyyrlig au fir alli Junge-n-und Alte und au fir die Passyve).

No ai Iebigsstund, denn goot s an s Drumeli und druffaabe-n-an d Fasnacht. Am Näggschte Mittwuch (11.2.) dien d Pfyffer d Piccolo stimme-n-und d Dambuure hänn hooche Bsuech vom Lee Caron, em Staardambuur us Ameerkia. Also nit verbasse ...

D Marina Suter vo unserer Junge Garde het dr hervoorragendi dritti Blatz bi de Junge Pfyffer erraicht. Häärzligi Gratulatioon!

Die eerschte Zaale vom dissjeerige Blaggeddeverkauf druudle-n-yy. Uff dr Sytte vom Blaggede-Team findet me die aggduelle Maischterverkaifer 2009.

S Programm vo dr näggschte Fasnacht isch jetz offiziell uffgschalte-n-und kaa au als PDF aabeglaade-n-und uusdruggt wäärde.

Eebefalls feschtglait sinn underdesse-n-au die baide Marschiebige: Mitwuch, 4. Hoornig, 20:15h, und Sunntig, 8. Hoornig, 10:00h. Dräffpunggt isch jeewyls an dr Drammhaltstell Eglisee. An dääre vom Sunntig kemme-n-au die Junge, d Schwleger und die Alte mit und es git e-n-Imbiss unterwäggs.

Jetz wisse mer ändlig, wemmer unsere-n-Uffdritt hänn. Dr gnaui Zytblann findet me im detaillierte Programm und uff dr neye Drummeli-Syte im Mitgliiderberyych.

Am näggschte Mittwuch (21. Jänner) basse mer d Laarve-n-aa. E jeede soll ab de-n-achti zoobe-n-im Käller verbyy koo (Nootfall-Uuswyychtermin wär dr Samschtig, 24. Jänner). D Termyyn fir s Goschdym-Baschtle steen jetz eebefalls fescht, me findet si im Kaländer und uff dr Fasnachtssyte im Mitgliiderberyych.

Noo-n-em Erfolg im letscht Joor staartet die Jung Garde-n-am Samschtig zem zwaite Mool d Aggtion "Last-Minute-Fasnacht". Ney git s e-n-aigeni Homepage drfir, wo me-n-alli Informatione und lauffend Neys drzue findet.

S Drummeli ruggt als wie neecher. Am näggschte und iiberiibernäggschte Mittwuch (14. & 28. Jänner) hämmer Stellbroobe in dr Aula vom Leonhardschuelhuus (bim zwaite Mool mit Goschdym). Mer feen pinggtlig am achti aa.

Am Samschtig, 10. Jänner, isch ab de zääni Blaggeddenuusgoob im Käller. S wird e feyn waarm Mittagässe gää und bsunders frait is, ass mer der Blaggeddekinschtler perseenlig deerfe begriesse und mit iim uff sy Wäärgg kenne-n-aastoosse. Alli Details findet me uff dr Yylaadig. Mer hoffe uff reege Bsuech, au vo de Schwelger, dr Alte Garde und Frinde/Verwandte/Bekannte.