Källerabstiieg |
25.10.2016 |
Dr Novämber isch dr Moonet, wo dr Bebbi vermeert in Undergrund goot. Am eerschte Samschtig (5.11.) im Glaibasel und am letschte Samschtig (26.11.) im Groossbasel. Uns intressiert nadyyrlig dr Groossbasler Källerabstiig, denn isch nämmlig au dr Dybli-Käller drbyy! Es git die wältberiemte Doonbreetli und Croque Monsieur.
Und doo isch au dr offiziell Blaan mit alle Käller, wo mitmache.
|
Pfyffer- und Dambuurenaaloss |
25.10.2016 |
Nit verbasse! Scho am näggschte Fryttig (28.10.) isch s traditionäll Pfyfferässe. Und Mitti Novämber git s en Iiberraschigs-Aaloss fir d Dambuure (Mittwuch, 16.11.).
|
Stand Källerumbau |
15.10.2016 |
Mit verainte Greft hämmer hit dr ney Käller wiider kennen in Bedriib nää. Dangg Nachtyysatz vo den baide Bau-Patricks isch dr Fänschterbangg fertig und mer händ alles butzt, fir ass am drey alles baraat isch gsii fir dr eerscht Aaloss.
Laider simmer nooni ganz fertig, v.a. d Dekoratioon wird noonemool e baar Yysätz bruuche.
|
Duubeschlag |
23.09.2016 |
Geschtert händ d Schwelger und die Alti Gaarde offiziell fusioniert. Sie haisse ney "Duubeschlag". Willkummen in dr Dybli-Familie!
Obmaa wird dr Heinz, Vize und Sekretäärin d Sandy und Kassier dr Leo.
|
Källerumbau |
03.09.2016 |
Geschter het dr Umbau vom Dybli-Käller aagfange. Mr gstalte d Deggi und d Belyychtig ney und nutze d Gläägehait, au s Eleggdrisch z modärnisiere und dr Bangg under em Fänschter fertig z komplettiere.
Es wird no mängen Oobe bruuche, bis mer fertig sind. E jeeden isch häärzlig yyglaade, ko mithälfe.
|
Generaalversammlig |
02.05.2016 |
Am Frytig, 27. Mai, isch die 34. ordentligi Generaalversammlig im Dybli-Käller (Diireffnig am siibeni, aafoo duets offiziell am achti). D Yylaadig isch scho verschiggt, wär s verbasst het, kaa si doo aabelaade.
Wär e GV-Aadraag mecht stelle, muess dää bis speetischtens am Sunntig vorhär bim Obmaa abgää haa.
|
Spiil-Sitzige |
14.04.2016 |
Letscht Wuche händ sich d Pfyffer und d Dambuure zem Start ins ney Fasnachts-Joor droffe. Nääbe den obligaate Rugg- und Uusbligg sind au d Spiilcheffe (wiider-)gwäählt woorde: Pfyffercheffin isch d Patricia und iiri neyi Stellverdrätterin isch d Vanessa. Bi de Dambuure het s gar kaini Wäggsel gää und me woggt s noonemool mit em Chef Michi und sym sträng protokollfierende Vize Claude.
S ney Joor stoot jetz ganz im Zaiche vom Drummelimarsch 2017, aber mee verroote mer doo no nit (d Komponischte wisse drum au no nit vyyl mee...).
|
Neyi Gsichter |
14.04.2016 |
Und nadyyrlig hämmer au neyi Gsichter deerffe begriesse:
Bi de Pfyffer kunnt s Trudi, wo scho lang drbyy isch und noo vyyle Joore Källerdienscht jetz wiider mecht pfyffe. Und vo extäärn stoosst d Tatjana zue uns. Häärzlig willkumme!
Sowyt soguet, aber bi de Dambuure het s e greesser Probleem gää, wo sich geschtert in dr eerschten Iebigsstund no akzentuiert het: Mer spränge langsam unseren Iebigsruum und unseri Beggli-Voorreet: Yynezwängt händ sich nääbe soonige, wo zwoor scho drbyy sind, aber sich nooni so aggdyv engagiert händ, grad au no folgendi Heerre: die baide Robin M. und Z., baides altbekannti Gsichter us iirer Zyt in dr Junge Garde, und dr Dieter, wo noon ere glainen Eererundi via Schwelger bi uns isch glandet. Und me mungglet, ass au noon e vierte neye Dambuur, wo men us syyner Junggaarde-Zyt häär no kennt, au wiider mecht yyneluege...
|
Fasnachts- und Bummel-Fottene |
07.03.2016 |
Soodeli. Ändlig git s wiider Fottene vo dr Fasnacht. S Archiv wird ney uffbaut, aafoo diemer mit em Joor 2016.
No mee als friener sind im effedlig zuegänglige Dail numme no Fottene, wo me nit jeeden ainzeln kaa ussenerkenne, und scho gaar kaini, wo dr aint oder die andere kennt pyynlig finden (drfir umso luschtiger fir die andere...). Das alles git s numme no im Mitgliideralbum, deert drfir immer grad alli Fottene, me muess also nit fir dr glyych Aaloss zwai verschiideni Albe duureblettere.
|
Sitzigen am Lauffmeeter |
07.03.2016 |
Jetz kunnt d Sitzigs-Saison. Aafoo diemer mit dr Lämpesitzig am Mittwuch, 9.3., am achti zooben im Käller.
Noo den Ooschtere feen d Dambuure mit eme glaine Vor-Apéro am Mittwuch, 30.03., aa und d Wuche druff sind denn au scho d Spiilsitzige (Mittwuch, 6.3.).
|
Fasnacht |
11.02.2016 |
D Fasnacht stoot vor dr Diir. Dr Stuurm het sich verzooge, mer hoffe drum, ass mer mit unsere Goschdym am Boode blyybe...
|
Dybli-Käller |
11.02.2016 |
Unsere Käller isch nadyyrlig offen an dr Fasnacht. Doo het s noon e glaine Flyer zem verdaile.
|
Homepage: Neyi Fasnacht – neye Versuech |
11.02.2016 |
Es het sich kai Noofolger gfunde fir dr alt Webmaster, drum styygt är jetz noonemool in d Hoose. Ainzelni Beryych sind no im Uffbau, dr Kaländer mit em Fasnachtsprogramm isch aggdualisiert und im Mitgliiderberyych het s scho die aggduell Adrässlyschte mit eme Email-Verdailer-Lingg. S Archyyv mit de Fottene isch dr näggscht aggduell Aagriffspunggt. S wird doo wiider brichtet.
|