Basler Dybli Stamm – Fasnacht 2018
Bruucht s mi no?
Hesch es sicher au scho gheert,
und bisch e weeneli versteert,
dr technisch Fortschritt haltet nit,
halte mir als Mentsch doo mit?
Wo vor hundertfuffzig Joor
die eerschten Auti mit Motoor
d Gutsche vo dr Strooss verdränge
händ Gutscher Angscht ghaa, s wuurd nimm länge.
Statt Resser biirschte, Ställ uusmischte,
sind s jetz Automobilischte,
doch s bruucht niemerts ooni Aanig
vo dääre ney Motoormechaanig.
Die näggschti Wälle rollt scho aa,
e Fliessband haltet halt nie aa,
statt Ainzelstigg, wo nit rentiere,
kaa me dausig produziere,
dr Aarbetsyysatz blybt dr glyych,
dr Fabrigg-Diräggter wird stairyych,
nur d Biezer miend in schwääre Zyte
um Dieffloon-Aarbetsstelle stryte.
Au Brieff mit rainer Musgglegraft
wäärde massewyys abgschafft,
bim Schuufle, Hämmere, Phiggle, Boore
het dr Mentsch scho lang verloore,
Motoor und Staal sind steergger, schnäller,
drfir kai Loon, nyt uf em Däller.
Zem sich geegen Abstiig z weere,
muess men eppis Rächts halt leere,
wo s Grips bruucht und e schaarfe Bligg,
Gnauigkait und ganz vyyl Gschigg,
zem d Maschiinen alli wien e
Dirigänt kenne z bediene.
Dangg Schuel und Leer und Fachabschluss
git s neyi Brieff im Iiberfluss,
woo men allem Aaschyyn aa
kaini Zuekumftsängscht muess haa,
Maschiine sind doch drääg und dumm
und kai Gfoor fir uns Brueffslyt drum.
Die technisch Revolutioon
rollt wyter und dangg Silikoon
kaan e Computer sälber dängge
und ooni Mentsch d Maschiine längge,
dangg als wie glainere Motoore
und Rundumbligg us vyyl Sensoore
schafft e Roboter autonoom,
s bruucht numme noon e weeneli Stroom:
Si faare Taxi, verdaile d Boscht,
pflääge Gäärten und Komposcht,
baue Stroosse, leege Glais,
draage d Keffer uf dr Rais,
koche s Ässe, deggen uf,
bassen uf die Glainen uf,
suuge d Woonig, fääge s Kemmi,
glette d Hemmli, gopferglemmi,
geen Gassi mit em glaine Daggel,
machen au diräggt dr Waggel,
äärnte Mais und mälgge d Kieh,
filze d Heerli ooni Mieh,
fille d Gstell, kassieren yy,
deguschtiere guete Wyy,
richte d Gnoche, operiere,
diend strängschtens Byyljee kontroliere,
luegen uf die laamen Alte,
bagge Broot, diend Schyter spalte,
ziend in Grieg, fange Dieb,
lesche Fyyr und luege lieb,
was me sich nuur dängge kaa
kaasch e Roboter fir das haa.
Ooni no go schaffe z miesse
kaa me jetze s Lääbe gniesse,
doch ooni Loon kenne die maischte
sich dä Luxus gar nit Laischte.
Iirgend wie duet s aim scho steere
ass dääne, wo d Roboter gheere,
dr ganz Profyt yystryyche dien,
die andere go stämpfle mien.
Mit Gligg bisch intelleggduell,
denn findsch villicht no gnapp e Stell
als Banker, Richter, Psycholoog,
Graafiker, Hailpädagoog,
Leerer, Forscher, Schuurnalischt,
Pfarrer, Gloon ooder Jurischt.
Doch d Entwigglig goot voraa,
s git nyt, wo d Technigg nooni kaa,
e jeedem rächt Roboter längt s
dangg kinschtliger Intelligänz
au Dängger-Brieff usstäärbe z loo,
wie soll das numme wyter goo?
Und glyy erraicht scho all das Gräät
die technisch Singularidäät,
denn bruuchts au Brogrammierer nimme,
d Computer diend elai bestimme,
wie s mit dr Zuekumft wyter goot,
d Mentschhait gseet do nuur no root.
Nummen eppis het, au ganz dieff unde,
me noo in kaim Roboter gfunde:
E Seel mit Liebi, Angscht und Muet
isch was dr Mentsch uuszaichne duet,
drum kaa zem Gligg, s wär nimm zem Lache,
e Roboter nie mool Fasnacht mache!
Technischi und anderi Wunderwäärgg findet men am
Zyschtig uf em Minschterblatz und bi dr Kasäärne.
Und wemme Gligg het, denn isch s aint oder ander
Wäärgg deert daatsächlig no vo Mentsche gstaltet...
|
