Fasnacht 2014: Alti Garde
|
|
Rädäbäng
| Sujet | Miir zaige Kunscht |
| Voordraab | sin Kunschtwärgg, aigeni oder fremdi, sälber gmacht |
| Ladäärne | zaigt uff, wie me Kunscht zaige oder au nit zaige kennt |
| Die wo pfyffe | sin au Kunschtwärgg, aigeni oder fremdi, sälber gmacht |
| Die wo drummle | sin no mee Kunschtwärgg, aigeni oder fremdi, sälber gmacht |
Bsunders
Die Alti Garde laufft hyyr wiider mit de Taktloose und zem zem eerschte Mool zämme mit de Schwelger.
Zeedel
zämme mit de Schwelger und de Taktlose
Miir zaige Kunscht
Vom Kunschtmuseum kunnt dr Bricht
mer machen e Joor lang dr Laade dicht
de kenntsch zwoor no pfundwiis Kunscht go entdegge
das isch ene schnorz – sy dien sy verstegge
Zwoor zaigt me vorhäär no Kunscht und duet nooni grad pfuuse
und jaggd vor Laadeschluss no rasch e baar Schnällschüss uuse
denn e ganze grossi Nummere basst jo nimm in Raschter
uf ney-dytsch haisst das, es gitt kai Blog-Baschter
drfyr nyyn Quick-Event,
wo kain richtig kennt
aber Hauptsach isch, me het gnueg drfyr brennt
und dass meegligscht vyyl Volgg no schnäll yynerennt
Wenn s Museum denn zue isch, das isch schitter
schiggt me d'Tourischte schynts no Ziiri witter
und fyr die, wo no blyybe – vergosch fascht vor Riehrig
gitts zwaimool im Daag e Baustelle-Fierig
dasch z Basel e Kunscht vo bsunderer Art
naimen anderscht nennt me das Stadtrundfaart...
Mit däm allem sinn mir gar nit ainig
und sinn sogar dr feschte Mainig
unsri Kunscht gheert nit in irgend e Dunscht
by uns gitts Kunscht grad ummesunscht
Mir findes nämmlig biirewaich
um nit z saage, schlicht e Saich
wenn d Kunscht im Stille umme-guggummeret
und im Versteggde vor sich anne schlummeret
Mit kinschtlerisch-blaante Mool-Sessione
hämmer ys als Clique nit welle schoone
drum isch jede vo uns en Unikat
und mer schleen au wie ne Pfau unser Rad
so dien mer ys am Cortège zaige
als veritable Kinschtler-Reige
Die Museums-Schliessig isch e Wilkür vom Staat
aber dä hett no anderi Kunschtstigg barat
wie das kolossali Verkeerskonzäpt
wo ellai scho sy Name nit überläbbt
denn s isch jo au Kunscht, das muess me verzelle
wenn d'vo lutter Verbott und Stau-Baustelle
yberhaupt no naime hesch duure welle
Dr ainzig Verkeer wo lauft, dasch s Fatale
isch im Glaibasel dä vo de Horizintale
und die versteggen ihri Kunscht
au nit im Dunscht, und dert liggts an dr Brunscht...
Kunscht z'zaige macht aim mänggmool Mieh
me ka derby e Schlabbe zieh
das gilt zum Bischpiil by Skulpture
vom Museum fir Kulture
zerscht gitts emool – s isch sone Sach
wägenem em Dach e bitz e Grach
kuum isch das doobe, s isch nit luschtig
merggd me, s fäält an dr Akuschtig
und gly haissts denn, s'isch usse zwoor cool
aber inne ehnder oberfuul
s Design isch jo top – heert me verzelle
nur kasch fascht nyt näbenenanderstelle
und s isch au nit grad jedem glääge
sy Kunschtwärgg abenander z sääge
Kunscht zaigt men au gärn in Miami
dert an dr ART Basel – muess Tout Bâle sy
he jo, s isch jo au e Raisli derby...
S gitt e Kunschtfüürwärgg am Strand
– aber intressant
luegsch der drinn en Akt-Figuur a
kasch zwoor Kultur und au Kunscht ha
luegsch der am Strand die glyych Figuur aa
denn isch's e Blutti - nur in Natura
In Münche, z hinderscht imene Egge
duet ain Milliardekunscht verstegge
läbt inere vergangene Wält
isch grangg, hett Lämpe anstatt Gäld
jä, wenn si vo de Nazi kunnt
denn kunnsch mit Kunscht hald uf e Hund
Dr Greenaway veränderts ganz
das Blätzli dert bym Doodedanz
blaziert so Holbein-Doode-Drepf
grad hinder de zwai Janus-Kepf
die blyyben aber stumm und drumm
drylle sie sich au nit um...
Kunscht oder nit – das spiilt kai Ruugel
Dr Baschi Dürr – dä stoot uf Google
Au dusse uf dr Schützematte
zaigt me Kunscht nit grad im Schatte
Kultur – will au dr Littmaa saage
miess me mee ins Freyi draage
nur was me derby bedängge sott:
stelled sy nit ins Parkverbot...
Staat und Kunscht lauft scho drum nit rund
will Kunscht bekanntlig vo Könne kunnt...
Bym Morin isch dr Schappo-Priis
sy allergröschte Kunschtbewiis
denn fühlt er sich, dasch gar nit mies
kulturell im Paradies
Isch men ächtsch z'Basel in dr rächte Spur
vo Kreativität, vo Kunscht und vo Kultur
wenn bym Lotteriefonds s Gäld so munter fliesst
dass me's im Musikantestadel noocheschiesst!?
E bsunders Kulturguet machts Baselbiet rammlig
s isch die Hanro-Unterhoose-Sammlig
aber verdrait das däänen ihr Budget emänd
und isch die Waar ächt nit numme "second hand"
aber sone Museum wär scho e bsunderi Choose
mit em Title, jetz muesch aanelosse
"Lieschtel und syni Unterhoose"
Kunscht, die soll me nit verstegge
Kunscht, die stelt me nit in Egge
duet sy au nit jedem schmegge
und dien e baar au dra verschregge
duet me sy hinteren Oofe stegge
denn ka me Kunscht gar nit entdegge
Kunscht muess me zaige – ums Verregge!
Und wenn de noo meh Kunscht wotsch gniesse,
goosch an d'Usstellig vo de Lampe bym Münster
und vo de Requisite by der Kasärne
(Mäntig zoobe bis Mittwuch demorge)
|
|
|
