Home

Vo vergangene Zyte

Fasnacht 2016: Stamm

Rädäbäng

SujetWottsch au e Schlugg?
Voordraabsuecht e lugratyyvi Gwelle
Requisitkaart s flissig Gold zu dääne, wo Gäld hännn
Ladäärnezaigt voorne sgrausaame Gschäft und hinde, wie s gmacht wiird
Die wo pfyffepfyffen uff die, wo nyt me hänn
Dambuurmajoorzaigt d Folge vo dr Gyyr
Die wo drummledrummle gyyrig fir mee Brofit

Zeedel

Basler Dybli Stamm – Fasnacht 2016

Wottsch au e Schlugg?

Art. 27 Bundesverfassig:
D Wiirtschaftsfreyhait isch gwäärlaischtet.

D Schwyz het kaini Boodeschetz,
doch d Wiirtschaft laufft wie gschmiirt und spriesst,
wil, so stoot s jo gaar im Gesetz,
si doo die volli Freyhait gniesst.
Am Byspiil voome Groosskonzäärn,
zuefellig uusgwäält under vyyle,
luege mer doch aimool gäärn,
wie die so iire Gwinn erzyyle:

Dr Finanzchef joomeret: Soo goot s nimme!
Im Milch- und Kaffibulvergschäft
diend Gwinn und Maarge nimme stimme.
S glyych gilt au fir d Gsundhaits-Säft,
fir Suppewiirfel, Feertiggricht,
fir Joghurt und fir Schoggistängel.
D Broduggtioon, die koschtet schlicht
aifach z vyyl, ych gsee doo Mängel.

Gschoggt frogt dr Bresidänt in d Rundi:
Ojeeminee, was kennt me denne
machen, ass mir wiider gsundi
satti Gwinn yystryyche kenne?
Si dischbediere hiin und häär,
em Broduggtmänätscher syyni Schnuure
wiird ganz drogge, drum nimmt äär
e Schliggli Wasser zwischeduure.

Uf aismool schreyt är: Heureka!
Fir Wasser muess me nit wyt lauffe,
in Fläsche fille, und me kaa
s fascht ooni Keschte dyyr verkauffe.
Dr Wäärbefritz isch ganz begaischtret:
Hejoo, mer schryyben aifach druff,
es syygi gsund, scho hämmer s gmaischtret,
und schleen bim Bryys um s Zääfach uff.

Scho spruudlet s Gäld ganz wunderbaar,
doch glyy isch s Waggsdum zämmebroche,
wil de Lyt wird bald mool glaar,
ass die au nur mit Wasser koche.
Jetz mäldet sich dr Usslandchef:
Bi uns im Noorde glabbt das nit,
us jeedem Haane, maint är brev,
s fir jeede suuber Wasser git.

Im Syyde gseen ych unsri Zuekumft,
deert isch suuber Wasser gnabb,
drum git s kai Gfoor, ass unser Gschäft schrumft,
und d Gäldmaschiine macht nimm schlabb.
Afrikaa wär gar nit schlächt,
deert kaufsch dangg Korruptioon fir baar
Doller alli Wasserrächt.
Wär denn das nit wunderbaar?

Mer bumpe s Wasser us em Boode,
in Fläschli gfillt, damit s nit stinggt.
Und s kunnt is rächt, wenn grad scho noo de
eerschte Dääg dr Peegel singgt.
Denn versiigt dr letschti Brunne,
em Volgg blyybt s Wasser us em Drägg,
esoo händ mir grad dopplet gwunne:
Die letschti Konkurränz isch wägg.

Dr Wäärbefritz haut aine druff,
will aismools noo dr Wooret strääbe:
Grooss diemer uf die Fläschli druff
"Rain Lääbe"-Ettigettli glääbe.
Denn simmer eerlig, s isch rächt fräch,
ooni unser dyyr Broduggt
kaa kai Mentsch lääbe - däm sy Bäch,
d Gwinn wäärde styyge wie veruggt!

Dr Finanzchef het e lyycht Bedängge:
Und wenn e Kind drwääge stiirbt?
Soonigs sotte mir uns schängge,
wil das dr ganzi Gwinn verdiirbt.
Kai Schtress, maint doo d Security,
Brodäschtler diemer unverdrosse,
wie d Eel- und Bärgbauindschtryy,
inoffiziell verschwinde losse.

Au dr Jurischt duet nit verzaage:
Sott s aim doch no z brichte glinge,
denn diemer dää mit vyyle Glaage
aifach per Gricht zem schwyyge bringe.
Aim ainzig Hinderbänggler blogt
s Gwissen ab däm deyflisch Blaan:
Mit Mentschelääbe wiird nit zoggt,
y find dä Blaan dr hällschti Waan.

Em Bresidänt wird doo ganz schlächt:
Loos, Hinderbänggler, Du bisch duss!
Mir händ verfassigmässig s Rächt
uf heggschte Dividändegnuss.
Mentschewiird und Rächt uf Lääbe,
und Kinderschutz find ych au guet,
doch isch so Zyyg dodaal drnääbe,
wenn s myyni Rächt tangiere duet.

Das wär s gsii, e kuurze Bligg
in die scheeni Wiirtschaftswält,
e jeede Wääg isch rächt und schygg,
Hauptsach, s git e Huffe Gäld.
So wandlet sich e Chefetaage
in e Hoort voll gytigi Gaier
und staigret sich dodaal in Raage
ab Mentschebluet und goldigen Aier.

Art. 27 Fasnachtsverfassig
Am Zyschtig sind d Ladäärnefreyhait
bim Minschter und d Waagefreyhait
bi dr Kasäärne gwäärlaischtet.

Nutz die Freyhait schaamlos uus!