Home

Vo vergangene Zyte

Fasnacht 2016: Jungi Garde

Rädäbäng

SujetE Herkules-Uffgoob
Voordraabsin mit Fotiapparat, Sunnebrillen und Bargäld underwäggs
Requisitisch wäg de Schulde vom Zeus perseenlig gstriche woorde
Ladäärnezaigt die ganz Misere in Bilder
Die wo pfyffesin Buurger, wo kai Gäld me hänn
Dambuurmajoorisch nit grad gligglig iiber die lääre Banggautomate
Die wo drummlesin au Buurger, wo kai Gäld me hänn

Zeedel

Basler Dybli Jungi Garde – Fasnacht 2016

E Herkules-Uffgoob

Es isch emool gsi vor langer, langer Zyt,
e stolzes Volgg, ryych und gaischtig fit.
Jo, sisch woor, die alte Grieche,
sin e ainig Huffe gsi voller gladde Sieche.
Sie hän könne baue, dängge, dichte, polidisiere,
schryybe, kämpfe, lääse und konkredisiere.
E Hochkultur, wie sy im Bilderbuech stoot,
mit ere Mythologie so riisig asses di halber erschloot.

Dr Poseidon het uff d’Schiffli uffem Meer uffbasst,
die bööse Buebe zem Hades gschasst.
D Aphrodite het gluegt, dass d Liebi floriert,
mit Hilff vo dr Demeter het das au funggtioniert.
Dangg dr Athene isch me gscheit gsi und uff Zagg,
mit em Ares het me sich gweert gege jedes Pagg.
Goot s dr mol schlächt, füülsch di wien e gschlagene Hund
bisch dangg em Apollon schnäll wiidr gsund.
Zoberscht – me dörf en nid vergässe –
isch dr Bappe Zeus uff sim Tröönli gsässe.
Sy Soon, dr Herkules, um göttlig z wäärde,
het Briefige miesse bewältigge uff dr Äärde.
Fascht unlöösbari Uffgoobe het men em gschtellt,
doch är het se gmaischteret, wiene ächte Held.

Im alte Griecheland, me kaas nid andersch saage,
het me wenig Grund ka zem sich beglaage,
doch denn hän d Römer übernoo,
es isch Grieg und Korruption ins Land yynekoo.
Im Mittelalter het sich s Land miesse de Krüzzüüg stelle,
uffsmool hän au d Osmane e Stiggli Griecheland welle.
Hüt nach vyyle Grieg und Gryyse
hän d Grieche iir Land zrugg, immene Zuestand, e myyse.
Die ryyche Zyte, die sin lang verbyy,
d Akropolis, die roschdet yy.
D Götter hän noodisnoo,
iir Volgg uffgää und dr Olymp verloo.
D Usgoobe styyge, Yynahme singge,
im Staate Griecheland duet s gewaltig stingge.
Doozmool d Erfinder vo dr Demokratie,
verliere sy als wie mee an Sympathie.
Em Zeus fäält dr Stutz in dr Modärne,
es längt kuum no fyr e Gleesli Wyy in dr Taväärne.

Wär isch schuld froggt me sich jetzt,
wär het s Land ins Eländ gschletzt?
Isches d Regierig, d EU oder d Bangge?
Ganz Europa kunnt derwääge ins wangge.
Me will wüsse, es isch zem gruuse,
Wie bekunsch die Grieche us de Schulde uuse?
Europa het e Gäldpäggli aabe gschiggt,
so wäärde d Schulde schnäller gfliggt.
es isch z wenig, am Banggomaat kunnt nüt mee uuse,
es längt nüm zem ässe und zem nöime pfuuse,
Jetz isch au glaar, noo de letschde Waale,
s isch abgstimmt worde: Athen will s Päggli nid zaale.
Mee Gäld wän sy aaber drotzdäm haa,
so funggtioniert Wirtschaft allem Aaschyyn aa.

Me wüntscht sich dr Herkules im grosse Root,
wo s Land uffruumt, wo waiss wies goot.
Dä könnt das Problem lööse, ooni Not,
und Griecheland wäri nimm döört, wo s jetz stoot.
Aaber mit em Herkules isches laider soone Sach,
är isch nur e Gschicht, sy Spirit nimm wach.
Jetz schtöön d Grieche doo, kai Gäld, kai Tschopp,
und mr froogen ys so ganz salopp,
wo sin sy aane, die alte Grieche,
das stolze Volgg voller gladde Sieche?