| Ummeblettere |
| Gumbb zeerscht in e Joor! |
|
Basler Dybli Alti Garde – Fasnacht 2013
zämme mit de Doopesuuger und de Taktlose
Schloof, Bebbi, schloof
Joomere und Motze – das dien naimeduure
in unserem Land zwoor maischtens unsri Buure
und mänggmool, do begryfft men au worum sy dien versuure.
Wenn aber fascht e ganzi Stadt beraits scho afoot bogge
will irgendain sich z schnäll beweggt, z lutt schwätze duet und gar froologge
denn jaggds dy – ehrlih gsait – so richtig uss de Soge !!
Schloof, Bebbi, schloof – wach sy isch halt doof
loss Dy in Dym Draum nit wegge
bring die Siechen ummen Egge
wo Dy yberall verschregge
Schloof, Bebbi, schloof, zell wyter Dyyni Schoof...
Isch z Basel emool ebbis loos, syge s e baar Täggtli an dr Freiestrooss
oder e baar Däägli Ambiente vomene Flooss
styggt naime e glains Feschtli, foot ain afoo muure
s goot e Fänschter uff und aine schreit: "halt d Schnuure !"
das syg kai Stimmig, das syg Lärm – und dä syg z grooss
das miess me jetz verbiete – däm gheer' lengscht dr Gnadestooss.
Vo lutter Singe, Danze, Luschtig sy und Schwoofe
kenn me in däm Basel gopferdoori nimme schloofe !
E Bischpill ngfellig ? Bitte sehr
nimm numme das Tattoo – oh läng mer s Gweer
nitt ellai dä Saugrach syg dert s Dumme
au die vyyle Schissene drum umme
ab däm do duet die grien Anita raase
jetz kenn sy nimm uf ihrem Rase graase
mir vermuete scho als allerneyschts Gefasel
pro Wuche bruuchs e Ruehedaag im mindere Basel...
E baar so Gleezi finde wirgglig alles schytter
und scho goot das Lamentiere freelig wytter
Me stoosst sich anere ganze Schwetti vo Buvette
vo dääne kenn me sich jo krytz und queer bald nimme rette
Und am Rhywääg sygsch als Fischer lengscht en arme Maa
wenn die dert am Grille sygd, biss'kai Fisch mee aa
Und erscht no am Sylveschter und am Erscht-Auguscht
by dääre Ringsum-Gnallerei uss Härzensluscht
do wärdis aim in dääre Stadt ganz äng um d Bruscht
und allerneyschtens no als letschte Fruscht
haig jetz au d Fyyrweer uf en aiges Bömbli Gluscht...
Schloof, Bebbi, schloof, machs Fänschter zue zum Hof
sunscht schreit emänd als Stroof
dusse none Goof...
In dääre Stadt haigssch s ganz Joor nimm dr Gnuss
vom Wilde Maa sym bleede Bellerschuss
bis zum Krattiger sym Summerlärm im Fluss
rumoors' jo praktisch Daag und Nacht voruss
Vo lutter Bebbi-Jazz und Blues verjaags aim schnäll
wenn me nit druff gfasst syg, s Drummelfäll
Au ysserlig do macht men aine mit
aim basst au die neyi Plastikfääri nit
und en andre ka sich nit dry schigge
dass me dr Wettstaibrugg ihr Gländer duet bestrigge
Schloof, Bebbi, schloof, es macht ys muff
yber alles reggt sich irgendainen uff...
Und wär's emool e bitzli still in unsrer glaine Wält
no biete sy no naimen imene Zirkuszält
e Frässede und ai Klamauk und s koscht e hufffe Gäld
Wytter goots vom Barfi-Sandstrand-Volleyball
bis zue irgendeme lutte Festival
Und erscht no rund um d Claramatte
zum Yberlääbr s ganz Joor Ohre-Watte
und wurd dy wirgglig emool nyt verschregge
no kääm bestimmt no iirgendsoone Dram go z'Giggse umen Egge
und gitts emool kai Lärm zem Joomere, no hilft en adre Furz
denn stingg sicher wieder sälli Titanwurz...
Vo lutter brave Basler Bürger uf dr Suech nach Rueh
goot in mänggem Hinterhof e gmietligs Baizli zue
Und zschuld sinn, die wo immer ummeryssle
die hänn hald schone grosse Sprung in ihrer Schyssle
Schloof, Bebbi, schloof und loss dy jo nit wegge
aimool im Joor muesch allerdings dr Kopf in Sand go stegge
denn do goots loos zer glyche Zyt an allnen Egge
und wär sich an däm Lärm duet närve oder gar verschregge
dä soll sich naimen anderscht go verstegge
denn wenn's rätzt und jubiliert und wenns duet schränze
no kasch mit Mögge wäge Rehesteerig nimme glänze
sotttsch dr im Geegedail bewusst sy ganz dernääbe
die Stadt verdient nit nummen an dr Fasnacht z lääbe
dass ebbis lauft isch au duur s ganz Joor nit vergääbe
Schloof, Bebbi, schloof, bisch nur zum Joomere geboore
no hesch, ehrlig gsait, by uns uff d Längi nyt verloore
Schloof, Bebbi, schloof, die Schlooferei isch yybel
Schloof, Bebbi, schloof vo mir uss – aber hausin Kyybel !!
Und wenn der feertig gschloofe hesch, goosch an d'Usstellig vo
de Lampe bym Münschter und ve de Requisite bi dr Kasäärne
(Mäntig zoobe bis Mittwuch demoorge)
|
|
