Ummeblettere |
Gumbb zeerscht in e Joor! |
|
Basler Dybli Stamm – Fasnacht 2012
Original kopiert
In unsrer Gsellschaft isch s nit sälte
ass epper mee als guet mecht gälte,
drfir muess me halt eppis laischte,
das schaffe denn so au die maischte.
Doch git s allbott dr ander oder aint,
wo schlauer als dr Räscht z syy maint,
sich dr aige-n-Uffwand spaart
und hofft, ass niemerts das erfaart.
Me sait däm Vorgang rabiaat
statt "Bschyss" ganz eedel "Plagiaat".
Wär uffliegt griegt e roote Kopf
und fyylt sich grad als aarme Dropf,
dr Ruef isch futsch, doch mecht sich jeede
mit Raibergschichte-n-uusereede.
Im Schwoobeland git s soone Zwärg,
dr Karl-Theodor ze Guttebärg,
dä isch – dumm wie-n-e Dromedaar –
e Plagiaats-Brachtäxemplaar:
Dr Gutti wott go dissertiere
doch wott iim nyt rächts gfalle
Do schiggt dr Gutti sy Gspäänli uus
äs soll go Yyfäll sammle
Gspäänli wott nit Yyfäll sammle
s wott iim nyt rächts gfalle
Do schiggt dr Gutti dr Ghostwriter uus
är soll e Täggscht go schryybe
Ghostwriter wott nit Täggscht schryybe
Gspäänli wott nit Yyfäll sammle
s wott iim nyt rächts gfalle
Do goot dr Gutti sälber uus
sich Voorlaage z kopiere
Ghostwriter wott jetz Täggscht schryybe
Gspäänli wott jetz Yyfäll sammle
em Gutti duet s jetz gfalle
Ungfäär soo, ha-n-ych mir dänggt,
het s em Gutti zem Doggter glängt.
Oder fir epper, wo aifacher tiggt
(Uffbasse, ass me sich nit verstriggt):
Voorlaag yyleege, drugg "Kopyy",
Bapyyr abgää und Doggter syy.
Wo-n-är denn zuegit, s däät iim laid,
ginnt är nyt als Schaadefraid,
wird gnaadeloos dur d Meedie gmoschtet
und emänd het s iim no s Ämtli koschtet.
Wie gwunne – soo verrunne!
Jä, d Technigg machts aim hitte lyycht,
ass me d Hemmig lyycht verschyycht
und statt sälber uusbrobiere
aifach eppis duet kopiere.
"Copy-Paste", das het – y wett –
sy Berächtigung dangg Internet,
fir alles, wo me jee het welle,
findet sich e Voorlaag-Quelle.
Au mir sinn doodrvoo nit gfeyt
und in die Falle-n-yyne gheyt:
Unser Goschdym kennt e kain,
s Originaal blyybt ooberghaim.
Kopiert isch au unsre Majoor
nämmlig vom Karli-Theodor.
Uff dr Lampe wiird erhellt,
ass au si e Kopyy darstellt.
Em Zeedel fääle korräggti Zitaat,
au är isch drum Plagiaat.
Zem Abchluss sing y doo verstoole
(mit emme Kaffi, ganz frisch gmoole):
Aadie zämme, Farbkopierer!
Am Zyschtig goot me-n-uff e Minschterblatz
go kopierti Ladäärne-n-und in d Kasäärne go
plagiadoorischi Wääge-n-und Reggwisytte bestuune
|
|