| Ummeblettere |
| Gumbb zeerscht in e Joor! |
|
Basler Dybli Schwelger – Fasnacht 2012
E griechischi Dragöödie –
Druurspiil in 3 Aggd
Hellas rutscht in Abgrund abe,
wenn nur nit alles goht vor d Rabe.
Das Ganz isch zimlig schlächt ussglegt,
mir gniesse s und dr Griech verreggt.
D Akropolis gly zämmebricht
underem schwache Eurogwicht.
Kei Glotz me zum se renoviere,
die wärde sich no rächt blamiere.
Griecheland, die stolz' Nation,
hüt EU-hörig – s isch e Hohn.
D Lyt dien nohdinoh verlumpe,
d Kinder dien nümm ummegumpe,
und bi dr Merkel isch jo klar,
au dört macht sich dr Euro rar.
Em Sarkozy gohts au nit besser.
Me hortet scho moll gfüllti Fässer.
Griecheland am Abgrund stoht,
will s eifach nümmi wytergoht.
Infos – im Färnseh, in dr BaZ –
so zimmlig alles isch für d Katz.
E Rettigsschirm, dä wird jetzt gspannt
über s ganze Griecheland
uss Dütschland, Frankrych und dr Schwyz.
Die Arme hoffe – s isch e Witz –
es wurd ene jetzt besser goh –
doch s Gäld isch fir d Behörde do!
Dä Schirm uss Euro, Cents und Frangge,
jä, au mir dien uns bedangge!
Zur EU ghööre mir zwor nit,
doch zaahle dien mer immer mit.
Uffe, aabe, nomol uffe,
sy wärde sicher nümm versuffe.
Dääglig duet d Zytig weniger schrybe
und au fascht nümm ibertryybe,
ganz langsam immer weniger brichte,
s gäbt zwoor non e baar schreegi Gschichte.
Doch s Änd vom Schlimmschte isch in Sicht ...
Dasch leider nur e Zwischebricht!
Will s Thema, das isch noonig duure –
Fliege die no paar Mol uf d Schnuure?
Aahang:
Au mir Schwelger sin fuuli Sieche,
gar nit besser als die arme Grieche!
Drum häm mir s Zeedelschriebe delegiert
und e jungs Dybli het is sy Erschtlingswärgg präsentiert!
Mir dangge ganz härzlig und heeben is am Schirm:
Liebs Jungs Dybli, Du bisch unser Rettigshirn!
D Ladäärne-Uusstellig uff em Minsterplatz und
d Waage- und Reggwisyte-Uusstellig bi dr Kasäärne
sin vom Määntig znacht bis am Mittwuch demoorge!
Deert und an de 3 Verkaufsständ (CINS) in dr Stadt ka
me au alli Zeedel und Schnitzelbäängg, d Blaggedde
und dr Rädäbäng kaufe.
|
|
