Ummeblettere |
Gumbb zeerscht in e Joor! |
|
Basler Dybli Stamm – Fasnacht 2010
Heil Dir Helvetia! Hast noch der Brücken ja
E jeede waiss vo glai uff aa,
ass d Schwyz sich sälber vertaidige kaa.
Syt Generatioone dien die maischte
Schwyzer Milidäärdienscht laischte,
wo als dr Helvetia iiri Seen
regelmässig in WK geen,
und wo im Ärnschtfall d Mässer wetze
und unsri schwyzer Gränze bsetze.
E jeede Find waiss was iim bliet,
wenn är iiber unsri Gränze ziet,
s ganze Land isch, joo das stimmt,
bedingigsloos uff Abweer trimmt.
E jeedes Daal kaa me doo speere
zem de Panzer d Yyfaart z verweere,
e jeede winzig Landschaftsflägge
kaa me mit Feschtigsfyyr bedägge,
und hinder jeedem Baum baraat
stoot e-n-uffrächt Schwyzer Soldat.
Und hätt dr Find das iiberwunde
het me-n-au no s Reduit erfunde,
im Mittelland wuurd me d Brugge spränge,
sich denn in d Alpe-n-yynezwänge,
um sich fir alli Zyt z verschanze
und em Find uff dr Naase-n-umme z danze.
Hitte-n-isch die Strategyy
zem Gligg scho lang dotaal verbyy,
d Schwyz wär nämmlig, wär s bassiert,
hit uff dr Gotthard reduziert,
d Schwoo..., äh d Find, wuurde s begriesse
in unsrem Flachland s Lääbe z gniesse,
und mir läbbte-n-in de Bäärge
aarmselig wie die siibe Zwäärge:
D Helvetia und iiri Seen
als alpinistischi Pause-Gleen.
Z Rächt isch s Reduit drum versandet,
uff em histoorisch Mischthuffe glandet,
die weerhafte Baute sinn iiberflissig,
me isch ene lengschtens iiberdrissig,
us Panzerspeere-n-in dr Not
git s e Naduurschutz-Biotop,
es wandlet sich e jeede Bungger
in e Kriegsmuseeums-Glungger,
us Brugge, Tunnel und strateegische-n-Objäggt
hoolt me dr Sprängstoff, wo deert dinne stäggt,
und dr Armee, schynts dr bescht uff dr Wält,
fääle d Manne-n-und au s Gäld.
Dr Helvetia sinn drum esoo
d Seen reegelrächt abhande koo.
Numme s Reduit in de Kepf vo gwisse
Lyt schyynt nooni ganz verschlisse,
eewig-geschtrigi Patrioote
dien reegelmässig in s Absyts groote,
wenn si politisch no immer brobiere
mit dr Helvetia z argumetiere.
Das Dängge-n-isch nostalgisch verfänglig
und au s Schwyzer Fäärnsee drfir empfänglig,
deert broduziert me-n-à la Ballebäärg
e schaal Big Brother-Reduit-Wäärgg,
wo populär-historisch kommentiert
dr Voyeurismus nur gnabb kaschiert.
Und wie goot s dr Helvetia, däm aarme Dropf?
Si wacht wytter am glaibasler Bruggekopf,
denn s will unsri Mittleri Brugg e
Dail vom Sprängstoff nit uuserugge.
Drum isch die Brugg bis hit geege d Hoorde
vom Noorde-n-als Bollwäärgg erhalte woorde.
Und mängmool znacht, in dr Helvetia iire Draim,
kunnt gar dr Läppli, wo insgehaim
bim Käppelijoch-Kommando-Boschte
d Zinder duet prieffe geege s Roschte.
Und doorum läbbt jetz, isch s nit schytter,
s Reduit z Basel eewig wytter.
Heil Dir Helvetia!
Hast noch der Laternen ja,
Wie sie der Münsterplatz sah,
Freudvoll zum Leuchten
|
|