| Ummeblettere |
| Gumbb zeerscht in e Joor! |
|
Basler Dybli Stamm – Fasnacht 2008
S CO2-Gschyss kunnt vyyl z spoot
wil s Meer glyy vor dr Diire stoot
S isch wisseschaftlig lengscht erwiise
Dryybhuusgaas sinn glaar e riise
Gfoor fir unsri scheeni Äärde,
wo duet derwääge weermer wäärde.
Kai ainzig Grad duet s mee verdraage
sunscht goot s am eewig Yys an Graage,
denn stygt s Meer halt als wie heecher
und kunnt uns Bebbi als wie neecher.
D Zivilisatioon bruucht vyyli
Brennstoff, laider maischt fossyyli,
d Mentschhait isch drum – s isch fataal
nimmi CO2 neydraal.
Poliddigger uss alle-n-Egge
leen sich vo däm Schogg aastegge,
si gloobe-n-in Kyoto fyyrlig
Besserig – s nutzt nyt nadyyrlig:
Dr Klyyma-Schutz goot deert vyl z wyt
drum macht au niemerts äärnschthaft mit.
E baar Joor speeter wird s dramaatisch
nuur dr Al Gore blybt pragmaatisch
fir sy Film saggt är – s isch myys
sogaar no yy dr Nobel-Bryys.
Dr Räscht vor Wält jettet uff Baali
fir e groosses Laari-Faari:
Me mecht e grächti Lascht-Verdailig,
verspricht e jeede hooch und hailig,
symboolisch verdruggt me gaar deert ääne
statt Dryybhuusgaas e falschi Drääne.
Doch kaine duet im Draum draa dängge
sich fir s Klyyma ächt yyzschrängge
solang dr Noochber aim nuur usslacht
und sälber laider nit au mitmacht.
Dä Noochber isch, wie jeede waiss,
im Wysse Huus e gaischtig Grais,
Klyymaschutz findt är nicht richtig,
d Äärd-Eel-Mafia isch iim wichtig,
und schiggt, wenn s syy muess, au in s waarmi
Klyyma grad no d US-Army.
Im Bush sy Äärd-Eel-Greessewaan
rueft Profiteur glyy uff e Blaan:
Straalendi Kapitalischte
wänn neyi AKW uffrischte,
und hoffe, ass dr Straale-Dood
vergässe goot wäg Klyyma-Noot.
D Buurelobby duet bedoone
au Biosprit bruuch Subventioone
(s duet zwoor d Wälternäärig lyyde
doch das will me glatt verschwyyge,
d Hauptsach isch, kamme-n-erfaare:
My Porschee kaa no wytter faare).
Au Speggulante, Beersehändler
(vulgo: UBS-Verschändler)
hänn, vo Subpraim no verbitteret,
e ney Profit – e fette – gwitteret
und mache sich fir s Gschäft baraat
mit Emissions-Zertifikaat.
Nuur ain, dr Vosseler, goot rierig
per Sunne-Boot in Klyyma-Fierig,
doch das hilft, me het das gsee koo,
au nit mee als e Placeeboo.
Y muess drum laider konschtatiere
ass sicher nie wird gnueg bassiere,
zem s eewig Yys vor em Verschwitze
und Basel vor em Meer z beschitze,
Wenn d Wasserpeegel wytter styyge
und nyt me hilft drotz Sandsagg-Byyge,
denn wird Basel bis uff eewig
zem schwyzerische Ney-Veneedig:
In de Gässli und de Stroosse
fliesst e wässerigi Soosse.
S faart kai Velo, Auti, Drämmli
nuur no Gondeli git s nämmli.
Uff s Käppeli-Joch, ass nyt bassiert,
wird schnäll e Lyychtduurmliecht montiert.
Regierigsreet dien im Verdraue
im Roothuushoof iir Schiff verdaue.
Per Gondle kunnt, scho langsam ranzig,
dr Schoorsch vom Haafebeggi zwanzig.
S wird verlangt, s isch unerheert,
ass jeede Schugger schwimme leert.
Dr FCB weggt neyi Gaischter,
wird Schwyzer-Wasser-Bälleli-Maischter.
E Beppi nimmt scho ab drey Schritt
uff jeede Fall sy Gondle mit
(numme soo halt blyybe d Sogge
drotz em vyyle Wasser drogge).
Und s wichtigschte, me kaa nuur hoffe:
D Fra Fasnacht syg no nit versoffe.
Mien mir das wiirgglig mool erlääbe?
Y find, das isch nit zem erschträäbe,
und hoff, ass mir – statt wytter z bschysse
s Rueder doch no ummerysse.
Am Zyschtig goot me – z Fuess ooder mit dr Fääri – an
d Ladäärne-Usstellig uff em Minschterblatz und au an
d Waage- und Requisite-Usstellig bi dr Kasärne
|
|
