Ummeblettere |
Gumbb zeerscht in e Joor! |
|
Basler Dybli Stamm – Fasnacht 2002
Dr letscht Furz
Leen Schoof ain fahre, gits Methan
Daas dryby schyynts s Ozon zem Wahn
D Auschtralier hänn – dodruff sensibel –
mit Wisseschaft und vyyl Gegnyybel
e Wirrggstoff-Impfig uusegfunde
jetzt furzt kai Scheefli mee dert unde
z Basel miesst me Schoof zerscht kloone
bevor sich s Impfe däti lohne.
Uns sin anderi notorisch
wo grad hitt obligatorisch
miesste gege Fiirz g'impft syy:
Als erschts wäär d BVB derbyy!
Mir hoffte, frisch g'impft wurde die
der Zwaier ganz no Rieche zieh.
Dr Ainser ohni Bruch lo fahre,
nimm an der Streggi vom Vierzähner spaare,
mit Zähner und Elfer zem Bahnhof brause,
dert gäbts fir d Chauffeur e Bippi-Pause.
Wäg där BVB-Exclusivité
so-n-eme WC-Hysli am SBB
wo dr Diggscht isch – dasch zem gryyne –
nit emol dr Dinnscht passt yne.
E Fuurz, das waiss jedes Kind
bezaichne Deggter gärn as "Wind".
Bio-chemisch sin Fiirz Gaas,
fir Bebbi sin si nit nur daas.
Fiirz sin im Grund gnoo ebbis glatts
gang lueg emol am Bahnhofplatz!
Wotsch dert zue de Ziig und wägg
(aigetlig däm Blatz sy Zwägg)
miesst me där' Gfoor fir Kopf und Kraage
Erläbnispädagogik saage,
badet im Angschtschwaiss dänggsch "wär ych froh,
gäbts die Unterfiehrig hitte no doo".
No bunter drybts by uns d Armee.
Hesch däne iiri Fiirz scho gseh?
Haigsch 21 Wuche gschnäll
verby als RS-Noowuggs-Täll!
Wär das glaubt, dä kaa gäärn go,
mir dien is UT schriibe loo.
By uns wurd nit g'impft wägem Gstanngg.
Gaas sin jo flichtig, himmelsdangg,
verrieche in dr Atmosphäre
(wenn gwissi Lyt nur au soo wääre)
bsunders, wemme als ka gsee
was wider fir e Fuurzidee
(wo me bi Verstand als gspunne
bezaichne wurd) no Lob het gwunne.
Bim Nobelbrys machts nit sovyl,
mit hundert isch me halt senyl.
D Mäss Basel – schynts scho immer gsteert –
wott – was me vo däm Brunne gheert –
dass d IWB zem finanziere
vom butze, mee dien abkassiere.
No legsch, drillsch dehaim s Wasser uff,
allewyl fir dä Brunne druff.
Au der MacDonalds macht mi muff,
schloot fir e bitzli z Bysse uff.
Wotsch am zwelfi z Nacht e Happe,
duesch bim Türk e Döner schnappe,
dert bisch vyl ginschtiger derby.
Dä Mac am Märtblatz miesst nit sy!
Falls ainewääg wotsch Gäld verschwände,
kenntisch fir die Holzbrugg spände.
fir jedes Brätt e Lappe mee,
d Brugg het glych no niemerts gsee.
In unserm Land wurd ebbis fähle,
dät der baari Ärnscht befähle.
Mir fändes zuegää au absurd,
wenn s gar kaini Fiirz gää wurd.
Grytte maches drum nit schlächt,
helvetisch gilts als nyt wie rächt,
me fahrt kaim effentlig an Kaare,
losst aber hinderruggs ain fahre.
Kai Furz isch d Ladärne-Usstellig uff em Minschterblatz!
Si isch vom Mäntig zoobe bis am Mittwuch demoorge z gseh.
|
|