| Ummeblettere |
| Gumbb zeerscht in e Joor! |
|
Basler Dybli Stamm – Fasnacht 2001
's wird gspiilt –
(mir ergere-n-is nit, miir spiile no mit)
Git's hit e Froog muess nundefahne
nimm nur e simpli Antwort aane;
dr Zytgaischt haisst di – ohni z'flueche
spiilerisch e Leesig z'sueche.
Hit läbt me nimme serioos
me nimmt spiilerisch sy Loos,
's spiilerische dominiert
wär waiss wo-n-is das aanefiert?
Zerscht an d'Fasnacht, (das isch glaar)
an die offiziell' sogar.
Dert spiilt sich s'Comité gross uff,
schloot by de Lyt um s'dopplet uff
derby sin au (ych find das schlau)
drey Gspänli fir die erschti Frau.
(Nur d'VKB wott lieber stärbe
statt ändlig aafoo Fraue z'wärbe).
Geg' dr Stau am Cortège zwoor
dien au d'Fraue nyt, dasch woor
me stellt nur als mee Regle-n-uff
und macht die halbe Dybli muff
will mir am Cortège Mummeschanz
lieber wänn als Dootedanz.
Wär wirgglig wott e Druurspiil gsee
goht an e Match vom FCB
d'Oehri (haisst's) well ass die Pfluutte
im Training dittele statt schutte
's wird dr St.-Jakobspargg, persee,
zer Dittistube, wirsch es gsee.
Aber nit elai bim Sport
nai, au an männgem andre-n-Ort
wird Zygs gspiilt, wo me halt nit sett
zem Bispyl "Moorhuhn" wie um d'Wett
nai, nit dehaim, das wär jo glacht
es isch im Gschäft, wo me das macht
wie jede Monet 's Deepli hohl
kasch dert (versicheret und wohl)
statt im Casino Gäld z'verliere
fir mee Lohn go demonschtriere
E Schachzug wie-n-en sich d'Genosse
fyr d'ZEBA hänn yfalle losse
Dr Vischer gheyt (ych find's zem gryyne)
au no uff das Driggli yne
verschleyderet, kuum isch er gwäält,
unser Styyrgäld, dasch verfäält.
(Drby hänn mir dä numme gnoo
zem dr Buecheli umgoo).
So Wahle sin kai Spiil, dasch gwiss,
die doo sin schlicht e riise Bschiss
's het ainzig d'Schaller sich drumpiert
will si gmaint het, 's funktioniert
und sii käämt – mit gueter Myyne
zem beese Spiili – scho no yyne.
Sii sait zer Babs: "Mir spanne zämme,
muesch luege, wämm mr d'Stimme nämme!"
"Fir was hänn miir e wyyblig Gschlächt?
Dä Frauebonus kunnt ys rächt."
(Me het trotz Gschlächt und trotz Genosse,
sii wie-n-e Moorhuen uusegschosse).
Soll doch die dr Giggel bigge
falls sii sich wyter losst lo bligge,
miir leen ys, drum dä Root sich z'hiete
nimm aifach jeedes Spiili biete
miir wisse uus dr Kinderzyt
das kaibe Spiile fiert zue nyt
eb gspiilt wird oder (neydytsch) gämblet
isch ainerlai: am Schluss wird ghändlet!
Nit gspiilt, numme gstuunt wird an dr Ladärne-Usstellig uff
em Minschterplatz. Si isch vom Mäntig zoobe bis am Mitt-
wuche demoorge. Kumm go luege!
|
|
