| Ummeblettere |
| Gumbb zeerscht in e Joor! |
|
Basler Dybli Stamm – Fasnacht 2000
Bellasitis militaris bschyssosa
WÄÄR ZAHLT DYY GHAIMARMEE?
Au wenn's e baar het, wo's scho wisse,
ych find 's isch taggtisch ganz gerisse,
wie me s Schwyzer Volgg drumpiert
und an der Naase ummefiehrt.
Do leersch vo glai uff in der Gschicht
d'Schwyz syg eerlig – suuber – schlicht,
s'gäb kai Bedrug und Korruption
in däre Wundernation.
Mir ryybe zfride unseri Ränze,
s' Ungraad haltet vor der Gränze,
s' Unhail kunnt elai vo dusse,
unser Findbild sin nimm d'Russe.
Die ney Bedrohig isch diffuus,
schitz is – Ogi – vor däm Gruus!
E Gaischtertruppe isch d'Idee
zem Gligg het d'Schwyz no d'SVP!
Die bruucht e Buure-n-Opfer quasi
diskret, verschwiige, dr Bellasi
dä setzt das um, still und verstoole
und vergryfft sich an de Koole.
Dä Filou het doch ohni Witz
fyr gnappi nyyn Millione Stitz
fiktivi Truppe kenne fiere
und vo däne s'Gäld kassiere.
Was sait der Blocher doderzue?
E-n-ainzig Mool kunnt numme Rueh.
Dä het der Latz sunscht immer offe.
Wär äär am Änd in's Gäärnli gloffe?
Dr Dino kunnt in d'Psychiatrie,
dert richtet me-n-em 's gmietlig yy,
denn wird em zimpftig 's Hirni gwäsche
und gleert, är syyg e Plaudertäsche.
Wenn är das scheen brav saage kaa,
kunnt er ewägg, als gmachte Maa.
D'Präss duet 's Thema ussrangiere,
kain wott mee driiber dischbediere,
wäär verschwändet ai Gedangge
an nyyn Millione Schwyzerfrangge?
Gäll, die Bellasi-Gschicht hesch gfrässe
und derwyyl scho ganz vergässe
fir Dii isch d'Schwyz halt glyych no heerlig
Du zahlsch au alli Styyre eerlig
nie dien Zwyyfel Dii beschlyyche
duesch jedi Rächnig grad beglyyche,
Stitz ohni Zins de Bangge leene
und numme ganz im Stille gleene
wenn d' Granggekasse uffe-n-isch
und Du scho bald 's letscht Hemmli gisch.
Dass Du Dy Birgerpflicht erfillsch,
das isch doch, was Du wirgglig willsch.
Du findsch au Politigg muess syy,
drum bisch bi jeder Wahl derby,
die wo Du wählsch dien Fudischlägge
mit bruune Zunge, Drägg am Stägge.
Ibrigens sin 's au die glyyche,
wo Dir d'AHV wänn stryyche,
sich sälber dyri Styyrgschängg mache,
und driiber sich ins Fischtli lache.
Mir Dybli geen mit Dir nit ainig.
Mir hänn doo e-n-aigni Mainig.
Uns längt's, mir mache 's dorum glyych
und wärde au mit Schwarzgäld ryych.
Miir hänn der Uurschrey inszeniert
und zimpftig Batze abkassiert.
Er isch fiktiv gsii – hesch nyt gspyyrt,
äxtra hänn mir das soo gstyyrt.
Wenn's denn am Mäntig vieri schloot
und uff ai Schlaag 's Liecht abgoot,
no duet me's wääge-n-uns abzinde:
im Dunggle leen mir 's Gäld verschwinde.
Vo unsrem Zug griegt 's Comit?
numme fiktivi Pfyffer z'gsee.
Die ächte dien mir halt e bitz
vertleene gege bari Stitz.
Waisch nit wohäär dä Dambour nä,
wo fählt fir fuffzä – fuffzä – zää?
Geege diggi Provisione
verschaffe mir Dir d'Subventione.
Am Bummel in der Freye Strooss,
mainsch es syg der Deyfel loos,
wenn Gugge Dir entgägewangge,
no hesch Du das au uns z'verdangge.
Uns kemme die esoo grad rächt,
die zahle nämmlig gar nit schlächt.
Au d'Clique wo durab stolziere,
leen vo-n-is hinter s'Liecht sich fiehre.
Ihr Gäld isch 's beschte fir ys – schlicht –
's isch styyrfrey, schwarz und wasserdicht.
Regt die Art Poilitigg Dii uff?
Findsch 's gemain und macht's Di muff?
Wotsch wisse, wie Du Di kenntsch wehre?
Mir gäbte Kiirs zem bschysse lehre!
Kai Ghaimsach isch d'Ladärne-Uusstellig uff em Minschterplatz
Si isch vom Mäntig z'nacht bis am Mittwuch demorge z'gseh
|
|
