Basler Dybli Jungi Garde – Fasnacht 1998
Dr Mars macht mobil –
doch nutzt uns das nit vyl
Lang isch s här, do het me gmaint,
d Ärde syg e Schyybe,
doch gscheyti Männer hän veraint
brobiert, uns daas uuszdryybe.
Fascht e jeede het denn tscheggt,
d Ärden isch jo kuugelrund,
drfir si zmitzt im Zentrum steggt,
haisst s jetz vo dr Himmelskund.
"Stimmt au nit", muess me denn gsee,
e Bolle simmer, e winzige
im Wältall gits jo no vyl mee ...
Sin mir denn nit die ainzige?
Die Froog, die duet is sythär blooge:
Simmer s oder simmer s nit?
Es wird vyl bhauptet und vyl glooge,
griegsch jeedi Antwort, wo de wit.
Hollywood, wie jeede waiss,
mischlet doo ganz frehlig mit,
mit Star Wars ooder Enterprais,
will s e Huffe dra z verdiene git.
Seggtierer brichten uns vo Getter,
wo d Ärden im ene Ufo bsueche.
Si preedige Hail und Donnerwätter,
nur sinnvolls duesch vergäbe sueche.
Das alles sin Phantaschtereye,
glaube dien das nur die Dimmschte,
s git kai Bewyys, es isch zem Schreye,
doch jetz kunnt doo no s allerschlimmschte:
Hindedure glaubt e jeede,
eb är s zuegit oder nit,
dass uff em Mars es deerten eebe,
doch so Usserirdischi git.
Grieni Männli lääbe deert
uff em Mars, em Roote Planeet;
e Farbkontrascht wo d Logik steert,
doch umso besser me si gseet.
In Glaube an die Griene Männli
sin d Mensche ganz vernarrt,
ooni z dängge wird jetz nämmli
nur no an Himmel gstarrt.
E Virus het is infiziert,
alli griegen e stiere Bligg,
dä Virus nischtet ungeniert
in unsere vergrampfte Gnigg.
Je mee me duet dr Mars betrachte
(deert kasch kaini Männli gsee)
vergisst men unseri Ärde z beachte,
das macht aim in de Auge wee.
Dä Virus lost is gar kai Rueh,
jetz muess unsri Technik aane,
fasziniert luegt me doo zue
und d Keschte kasch nit mol erahne.
Mit glaine Schrittli foot men aa,
e Sputnik duet um d Ärde kraise,
speeter denne kame bald
uff e Mond und zrugg go raise.
Unterdesse will me teschte
wie lang me (das dien d Russe),
ooni Schwäärgraft, ooni feschte
Boode lääbe ka deert usse.
Doch statt Gnocheschwund go mässe
wärde d Närve strapaziert,
und uf dr MIR het me vergässe:
Mit Windows 95 nyt funktioniert.
Mit dr MIR hän s d Russe gschafft,
dass dr Virus fascht besiigt isch worde
und kaine mee dr Mars begafft.
Jetz mache sich au d Amis Sorge.
E Spiilzygauteli wird erfunde
und rasch zem Mars uffe gschiggt,
doch Männli het au äs nit gfunde,
nur Schutt und Gröll het men erbliggt.
Dä Misserfolg, dä losst is kalt,
dr Virus het is fescht im Griff,
näggschtens do brobiere mer s halt
mit Mensche im e Mars-Ruumschiff.
Vyl Keschten und au vyl Uffwand
fir dä Mars-Virus-Furz.
Y froog : Isch das nit allerhand ?
Dänngt me doo nit aifach z kurz?
Uff Ärde hämmer gnueg Probleem,
wo dringend noon ere Leesig schreye.
Hunger, Grieg, s isch nimme scheen.
Doch s Gäld fir e Mars uusekeye?
Zem Schluss verroot y Eych dr Witz:
Uff em Mars sin d Männli, persee,
halt nit grien – nur rooti git s
drum kennet ir si au nie gsee!
Nit uff em Mars – nai, allewyl no z Basel uff em Minschter-
platz isch d Ladärne-Uusstellig. Kumm go luege!
|
