| Ummeblettere |
| Gumbb zeerscht in e Joor! |
|
Basler Dybli Stamm – Fasnacht 1995
Vor luter Starrbligg kai Durbligg
Und fir die mit em Hohlbligg – dr Bligg
Ych bi-n-e Basler Fasnachtszeedel
E Bitzli ärnscht – e Spuur Gebleedel
Wie-n-is das so aige-n-isch
Und du, du sitzisch ame Disch
– oder uff ere WC-Brille
Und produziersch grad Bio-Gille –.
Als Erschts muess ich dir ebbis saage
Bivoor du halbwägs duesch verzaage
Und uff mii aabe starrsch wie bsässe:
Ych wird kai Bild, das kasch vergässe!
Biecher sait me, sin zem Lääse.
Wär liist, isch e belääse Wääse
Und darf sich, ohni wirgglig z'welle
Zue de-n-Intellektuelle zelle.
Die Zyte die sin jetz verby,
Hit liist me nimm, hit luegt me dryy.
So eergere in Lääsesääl
Dutzendi sich blau und gääl
Und heersch e Huffe Seher flueche
Wo vergääbets no-n-em Durbligg sueche
Und schiilend ihri flache Zingge
Vergraabe-n-in de 3D-Schingge.
Fertig isch es mit dr Rueh.
In Bibliotheke goot's scho zue
Wie in ere Näärvehailaaschtalt
Bedingt dur Depression und Gwalt.
Mit em Durbligg sig's e Drama,
Sait dr Stich zem Dalai Lama
Und froggt verzwyflet ihn um Root
Wie die Mehrwärtstyyr äggscht goot.
Är gsäächi iberhaupt nimm dure
Und zuedäm syg är uff dr Schnure!
Do sait dr Gott vo de Tibeter:
"Fir 's Volgg bisch Du dr Schwarzi Peter,
Drum ryss e Seppi, kurz und knapp
Und zieh Dii vo dr Voorschtyyr ab."
Au em Ogi, däm Bärgler-Ruech,
wird's efange richtig gschmuech.
Syt Moonet gäb är sich scho Mieh
Doch gseh haig är's bis jetz no nie.
"Statt em Durbligg", hersch en flueche,
"Muess y zerscht dr Durstich sueche."
Und 's Dreyfuess Ruthli het beschwoore
Si haig dr Iiberbligg verloore
Wo si sich fir 's AHV-
Ränte-n-Alter vo dr Frau
queergstellt het und impulsiv
zwyyflet het am Kollektiv
(Dasch 's ainzig Mool gsi, 's isch zem Lache,
Wo ihri Gspäänli sin verwache!)
Dr ainzig wo dr Durbligg hett
Isch, do mache mir e Wett,
Dr Jean-Pascal Delamuraz
Dä frait sich und sait: "Ohlala,
Isch weiss nischt, was iir alli händ,
My Wyyglas, das isch transparänt."
Au z'Basel tappe si im dunggle.
Jetz hert me-n-in de Gässli munggle
Ass unseri Regierigsspitze
In Sitzige duet noochesitze
In corpore, ganz konzentriert
Kollektiv uff Bilder stiert
Und au 's Fasnachts-Comité
Duet's amme nimm so dytlig gseh
Und duet sich sälber zelebriere
Losst d'Fasnacht ihre Gaischt verliere.
Ihr mergget, 's bruucht halt doch vyyl meh
Zem gwissi Sache richtig z'gseh,
Drum duet in Zuekunft schynts dr BLIGG
(Dä Service finde mir ganz digg)
Nimme wyter 's Volgg verhetze
Und Täggscht dur Bildeli ersetze.
Eso het au dr letschti Gloon
sy heggschtperseenlig Dimension
Und gseht är's nit, isch's au nit schlimmer,
wenigschtens wird är nit dimmer.
D'Moral isch ussergwehnlig simpel:
Trotz allem holographe Grimpel
Und visueller Farb-Magie
Isch dr Durbligg Utopie.
Anstatt is sälber z'iberschetze
Und d'Zyl in's Unermässlig z'setze
Sotte mir vernimftig blybe
Nit allewyl go ibertrybe.
Zem Schluss – so hoff y – hett Eych alle
My Inhalt doch e bitzli gfalle.
Y winsch Eych Guets und ha-n-e Bitt:
Verleeret aifach 's Lääse nit!
Mit Durbligg und trotz Starrbligg oder au
Hohlbligg goot me-n-an d'Ladärne-Usstellig
uff em Minschterplatz
|
|
