| Ummeblettere |
| Gumbb zeerscht in e Joor! |
|
Basler Dybli Stamm – Fasnacht 1993
Basel – Dotedanz...
Basel, stolzi Stadt am Rhy
Stäggsch efange dief im Drägg
Es schynt als wär dy Zyt verby
Die Tatsach schläggt kai Gaiss ewägg.
Du groossi Humanischtestadt
Wie dief wirsch du no aabesingge
E mängge findet's nimme glatt
Sait: "Aadie" und glopft d'Fingge!
Kulturell bisch du, 's isch wohr
E Hochburg gsi, e wohri Pracht
Mit groosse Schritt laufsch du hit Gfohr
Ass iber dii me nur no lacht.
D'Fasnacht darf nimm kritisch sy
Me basst sich aa und wett gärn gfalle
Brisanti Theme losst me sy
Das basst jo schliesslig au nit alle.
Meegligscht aifach und banal
Und luschtig muess e Sujet sy
Nit wie friener – Genial,
Fräch und muetig – dasch verby!
's Theater isch e-n-aige Drama
Und isch grad in sym letschte-n-"Aekt"
's goht nimm lang, merggt 's letschte Lama,
Woo dr wohri Deyfel stäggt.
Syt Johre maine d'Intendante
's Volgg syg fir 's Theater doo
Und fyhle sich denn unverstande
Wenn kaine me duet aanegoo.
's Gäld fliesst uus vollem Rohr
's Theater muess me unterstitze
's gäb weniger im näggschte Johr –
De-n-Arbetsloose duet's nyt nitze.
Vyli kemme sich, 's isch wohr
Bim stämpfle in dr Utegass
Wie Altglas im Container vor.
So ebbis macht bigott kai Gspass.
Stelle-n-Abbau iberal
D'Uussichte fir d'Zuekumft sin
Nit unbedingt phänomenal
Mit stägge-n-im Schlamassel drin.
's goht finanziell rapid bärgab
's Defizit wirkt astronomisch.
Gspaart wird schynts und das nit z'knapp
Doch ebbis dunggt is schuurig komisch:
's Baselbiet duet's nit geniere
Syt Johre dien sy profitiere,
Kemme no Basel go studiere! –
Me muess ene's halt vor Auge fiehre,
Ass es esoo nimm wytergoht!
Sy solle d'Laschte hälfe draage.
's isch d'Uffgoob vom Regierigsroot
In aller Dytligkait das z'saage!
Gliebt Basel, saag, wo fiert das aane?
Es wird ys langsam Angscht und Bang.
Due doch ebbis nundefaanae
Sunscht git's di wirgglig nimme lang.
Nit groosskotzt, kalt und unperseenlig,
loss doch Ziri Ziri sy.
Blyb beschaide, härzlig, gwehnlig.
Und syg e wenig stolz derby!!
...aber nooni ganz
Basel stirbt doch nooni ganz
E wichtig Thema mit Brisanz.
's isch an dr Zyt dr Basler z'rittle
und die gschlossne Auge z'schittle!
Bim EWR schiesse uns d'Schwyzer ab
Und setze d'Wirtschaft fascht schachmatt.
Vo de Eidgenosse lehn mr is lo gfalle
Me syge Romands wo dien Allemand lalle.
Mit em Elsass und de nooche Schwoobe
Diemer neyi Wääg erproobe.
Nit so wie dä Schelm vo Ems duet saage
Me soll de Usländer jetz an Graage.
Mr lehn is nit vo dr SVP diktiere
Wie unsre EWR soll funktioniere.
Als offehärzig Tor zer Schwyz
Macht kaine meh e fuule Witz.
Doo am Rhy es isch kai Hohn
Hämmer multikulturelli Tradition.
Basler jetz mien mer zämmestoh
Numme soo ka's wytergoo.
Ass es nyt me z'hueschte git,
Haisst's: D'EG macht bi Basel mit!
Stolz wie die drey scheenschte Dääg,
Das wäri doch dr beschti Wääg!
Kinschtler sin hit wider gfroggt.
Kai Politik, wo Idee abbloggt.
's goht nit drum mit Gondeli iber em Rhy go glänze
Sondern geegesytig is z'ergänze!
Wie dert in friehnere Johre
Bruucht's jetz wiider Leit-Faktore.
Mr hoffe im Joggeli so ebbis z'gseh,
Y main e stargge FCB!
Au fir Glaitheater bruucht me Gäld.
's isch wichtig fir e Stadt vo Wält.
Em Basler dien d'Läbensfraide fähle
Das isch es, was en soo duet quäle.
Nimmsch alli Scheenhaite-n-ewägg,
Wird unsri Stadt e wieschte Flägg.
Was bringt is all dä Firlefanz?
Aigentlig nur Dotedanz!
Mr bruuche gueti Kab'retischte
Nit numme so Zwäggoptimischte
Schlimm wär's – fiehr dr das vor Auge –
Wenn e "Gifthütte" nimm wurd tauge.
Basel, hesch's nit ändlig satt?
Mit Glimmer und Gloria bisch nimme glatt!
So, lieb Basel, wahr dy Gsicht
Und schryb nit Dotedanz in d'Gschicht.
's läbändig Basel findsch an dr
Ladärne-Uusstellig bim Minschter
Gang go luege – und gniess es!
|
|
