Basler Dybli Stamm – Fasnacht 1991
HYP-HOP
Hesch du e Hysli dir lo baue
mit Schwimming-Puul, 's het di nit g'raue
und Sauna-Massaasch-Fitnessruum,
(me basst sich aa em Gsundhaitsbuum),
mit Doppelgaraasch fir dy Kaare,
esoo fescht muesch jetzt au nit spaare,
ass du dir das nit kenntisch laischte,
's hänn's jo sowieso die maischte.
Hesch, zem das alles z'finanziere
denn, no langem kalkuliere
e zwaiti Hypothek uffgnoh,
- fir das sin d'Bangge schliesslig do -
Denn hesch dr's richtig gmietlig gmacht
und in dym Innre säälig glacht.
Doch pletzlig isch dy Friide gsteert,
gar heftig hesch ain joomere gheert.
Hooch oobe uff em groosse Ross
do hoggt dr Nationalbangg-Boss
und probiert, ganz ohni z'lache
e bitzli "ain uff Panik" z'mache.
Är sait, eso gieng das nit wytter,
är gsächi unsri Zuekumft schytter,
wenn mir nit sofort reagiere
wurd's ganz Syschtem grad kollabiere.
Ar joomeret, 's isch zem Erbarme,
me miess 'ne hälfe, dääne-n-arme.
Nit de Schwoobe und de Russe,
die sind uns doch glych dert usse,
au nit de Tirke und Tamile
(die Gschicht isch sowieso zem Hyle),
au unsre Räntner nit, grad z'laid
(das het denn au dr Felber gfrait).
Nai, unsre Bangge gieng's an Kraage
es dät em schuurig weh, das z'saage,
d'Finanzwält lydi Hellequaale,
drum muess dr Schwyzer Binzli zahle.
Es haig jo sicher kain e Wuet,
es gieng is sowieso vyl z'guet.
Und denn jaggt dä bleedi Gnoom
dr Hypozins in's Hypodroom!
Das het dr Lusser viermool gmacht
und het dermit e Fyyr entfacht.
D'Wirtschaft kunnt, dangg unsre Bangge
Johr fir Johr no meh ins Schwangge,
jede Brys stygt scho bald dääglig
dr Maage knurt, 's isch unerträglig.
Im Baugwärb hänn si, 's isch nit toll,
statt 's Portemonnai jetzt d'Hoose voll
und uns bedroht e-n-Inflation
und als Folg denn d'Rezession!
Hösch Bebbi, gsehsch wo's duregoht?
Läbsch ime Land wo Hochverroot
und Korruption scho ganz normal isch
und jede Gauner bald loyal isch
wo me die Alte aabedruggt
und iber d'Jugend d'Aggsle zuggt,
und wo d'Regierig liegt wie druggt,
saag, macht dy das nit au verruggt?
Frissisch in dr Baiz e Schnitzel,
bisch umgäh vo Ghaimdienscht-Spitzel,
es isch e Schand, 's isch nämlig wohr,
und das au no im Juubeljohr.
Dr "Weg der Schweiz" verschlingt Millione,
lut Bundesroot duet sich das lohne
fir 's Défilée e Rampe z'baue
zem mit de Panzer driber z'saue.
Es syg e-n-Inveschtition
wo sich uff jede Fall no lohn.
Zem das Defizit usz'glyche,
wurd me d'IV-Dyrig stryche!
- Do froog ych mii: Sin die no gsund,
si drybe's mit is kunterbund
und dien aimool meh die Alte
mit fuule Trick zem Naare halte,
drfir gsehsch denn am Juubelfescht
d'Familie Kopp als Ehregescht!!!
Glopf doch ändlig uff e Disch
und bewys, ass d'ebber bisch,
loss dr nit uff d'Kappe pfunde,
due bi dr näggschte Hypo-Runde
uff dr Bangg dy Konto stryche,
(muesch luege wie si kemme z'schlyche!)
mai, die wurde sich bedangge,
unsri Hypochonder-Bangge.
Wenn alli dääte reagiere
Und so ebbis durestiere,
no hätt's dr Birger in dr Hand
und wurd bestimme in sym Land!
Doch laider sin das alles Draim!
Und jetzt ihr Schwyzer, ab uff d'Baim.
Gang an d Ladärne-Uusstellig uff em Minschterplatz.
Si isch offe vom Mändig znacht, em 18. Hornig, bis am
Mittwuch demorge, em 20. Hornig.
|
