Ummeblettere |
Gumbb zeerscht in e Joor! |
|
Basler Dybli Stamm – Fasnacht 1987
Adie Fasnacht! (oder: dr Fasnachts-Exhibitionismus)
No liggsch im Bett bi dir dehaim
schwelgsch efang in Fasnachtsdraim
waisch gnau, ass es gly vieri schloot
e-n-Augebligg dy Härz stillstoot;
fyhlsch di säälig fir drey Dääg,
bisch dernoote 's ganz Joor zwääg.
Nadyrlig hesch scho lang di gfrait
Verglaidige dir zämmedrait,
dy Süschee zue dym Ghaimnis gmacht,
wenn ain di gfrogt het, numme glacht
und dänggt: Vorewägg bruucht's kaine z'wisse
(vo de Reemer wird's jo doch verrisse)
elainzig bisch bald däre Mainig
y glaub doo sin mir zwai ys ainig:
Em glaine Maa sy Sach isch's nimme
sorg z'gäh, ass "fasnacht" fir d'Fasnacht no duet stimme
jetzt luege groossi Carnevals-Heere
fir ass es au dr Letscht sott lehre
kai Massge mee darf inkognito laufe
d'Fasnacht muess sich guet verkaufe.
D'Kafka AG mach 's Gschäft drmit
und dr Bebbi sait zue all däm nyt!
Jetz wartisch - es sott vieri lyte
gheersch es nimme - 's sin schlimmi Zyte:
E Huffe Lyt am Stroosserand
e Dail vo de Clique im Alldagsgwand
e Larve numme-n-as Alibi
(zwor nit vor em Gsicht) nai, uff ere Bygi
bim Gossdym - sicher 's scheenscht vo alle
zem zaige und zem allne gfalle!
In dr Hand glänzt e-n-Attrappe
vo Piccolo mit goldige Glappe,
e Kalbfäll-Drummle (die isch ächt)
au d'Margge-Schleegel sin nit schlächt,
zwor kenne si nimme ruesse und pfyffe
dien gnepfle-n-und ohni bloose gryffe,
e jeede wott numme meegligscht gly
dr maischtbekannti Bebbi sy!
Du gsehsch das, stuunsch und dänggsch drby
das ka jo gar nit meeglig sy.
Pfätzisch di, well d'mainsch sygsch am draime
he nai, de bisch doch nimm dehaime,
de stoosch doo wirgglig uff dr Strooss -
's Liecht goot uus, dr Spedaggel loos.
Wottsch dä schregglig Momänt vergässe
goosch in e Baiz go-n-e Mählsubbe-n-ässe,
Dy Kibel loosch siider vorusse stoo -
scho het en aine als Aadängge gno.
Dernoote suechsch no dyner Drummle
nimmsch dr e bitz Zyt zem Bummle,
luegsch d'Lampe vo de Clique-n-aa,
liisisch d'Süschee und frogsch: "Wasch do no dra?"
D'Fasnacht isch hitte z'apolitisch
kai Clique mee isch richtig grytisch
numme d'VKB, bländet vom aigne Glanz
wott das anderscht mache ganz.
Si mache di aa fir dr Rassismus,
uff em Zeedel kiechle si mit em Faschismus,
dasch mänggem Bebbi z'odioos
und wirggt nit ebbe grandioos.
Das merggsch jetz alles und wirsch daig
froggsch di eb's ächt kain mee haig
wo no Witz het und Satyre
wo nit dra dänggt sich sälber z'fyre,
ain wo no intrigiere ka,
sich frait, drey Dääg kai Namme z'ha,
e Fasnacht lang ka säälig sy
und waiss: am Donnschtig isch's verby!
Ain wo sy Kibel uff d'Syte stellt
und sich nit zue däne gsellt,
wo bald 's ganz Joor Fasnacht hänn,
will si gärn dr Greescht sy wänn.
Speeter in dr Freye-n-oobe
am ene Bummelsunntig Zoobe
luegsch was so bassiere duet
wenn d'Gugge - scho mit Eel am Huet
und d'Clique grad vom Bahnhof uus
vom Elsass-Bummel (oh, dä Gruus)
zrugg kemme und sich dien formiere
zem wiirdig d'Freye-n-ab z'stolziere.
Das findet mängge villicht luschtig,
Dii aber macht das ganz nit gluschtig,
gsehsch gschmäggerlig uus und 's wird dr gschmuech
Adie Fasnacht! - Dangg fir Dy Bsuech!
D'Ladärne-Helge ('s isch ebbis glatt's)
Kasch bschaue uff em Minschterblatz!
am Zyschtig vo 9-23 h und am Mittwuche vo 9-11 h
|
|