| Ummeblettere |
| Gumbb zeerscht in e Joor! |
|
Basler Dybli Stamm – Fasnacht 1982
(s)excluusiv Basel
Friehner bisch uff Kopehaage,
Uff Paris (diräggte Waage),
Bangkok zue, dreywuchewys:
"Hello Mistel, Massage please?"
Oder 's het dy Glygge-Klaan
Gsait: Mir wänn uff d'Reeperbahn!
n
Vellicht hesch au nur e bleede
Doonfilmstraife bstellt in Schweede.
Hitt hesch's neecher: Gang ins Stedtli,
Dert findsch ginschtig glatti Grettli.
Nur maint jedes Kädderli,
's syg d'Lady Dschädderli.
Juggt's di, als hättsch naime-n-Aisse,
Muesch halt go go Gogo gnaisse.
Schwarzi Gumsle, gääli Schaabe:
Crazy Girls vor alte Knaabe!
Mänggmool iberzieht me d'Doosis
Und griegt iberaal Red Roses.
Bletzlig hesch kai Fraid meh draa:
Muesch zem Doggter FMH!
Was fir Ressli amme Ascot,
Isch fir Seyli 's Kino Mascotte.
Spanner sehn im Ciné Corso
Jedi Art vo Fraue-Torso.
Und im Morgarte-n-und Clara
Gluschte Dschingge: Mia Cara!
Du hesch aber sowiso
Partnerduusch im Video.
(Nur die allerdimmschte Kälber
Kaufe das no: Machsch es sälber!)
Goht dy Frau emool in d'Feerie,
Gniessisch Color-Climax-Seerie.
Oder lüütsch under "Vermischtes"
(Abdruggt in dr Bazi ischt es)
Aifach sällere Nadja aa
Oder au dr Julischka.
D'Manuela, d'Ruth und Maite,
Die ziehn uff ganz andri Saite
Als d'Natascha oder d'Dschuba
Oder d'Ulla by dr Muba.
Und bisch ganz e dolle Freyer,
Mache zwai mit dir e Dreyer.
Kauft dy Alti ächt im Shop
"Pflegeleicht" und drum tipptopp
Schmützgi-Tanga, Lulu-Slip,
Schleyer fir e Mammi-Strip?
Und im Jupe danze pro domo
Transvestitisch-granggi Homo
Sapiens e Tarantella.
Und me pfyfft "dr Arabella"
Im Theater, vorwärts, marsch!
D'Laupere keyt uff e-n-Arsch.
Wotsch drotz Nyt-Due vyyl verdiene,
Kaasch by uns das fascht wie niene:
Startsch e luuschi Piep(en)-Schau
Mit null Wesch und sehr vyl Frau.
's wird Tribut em Sex halt zollt,
Basilea iberrollt.
–--------------------------------------
Mit dr Zyt wirsch aber stumpf.
Züchtigkait isch bletzlig Trumpf.
Und 's wird mängge haisse Saulus
Speeter zeme laue Paulus.
's Färnseh zaigt fir Basler-Bluntschi
d'Feddersen statt 's Senne-Tuntschi.
Und well kain meh goht go gnaisse,
Schnabbe-n-alli blutte Gaisse.
Kurz druff aabe het me gnue:
Jede Blaue Bogg macht zue.
Wääge däm läbt Basel au
Speeter ohni Nabelschau.
Statt em Mutzebacher-Porno
Lisisch brav dr Bolle Schorno.
Arbetslos wird jedi Nuutte.
Und denn stämbble-n-alli Pfluutte.
D'Ladäärne-Uustellig findet in dr Rundhofhalle vo
dr Muba statt und zwor am Zyschdig vom Nyni demorge
bis am Elfi znacht und am Mittwuch zuesetzlig vom
Nyni bis am Elfi demorge.
|
|
