| Ummeblettere |
| Gumbb zeerscht in e Joor! |
|
Basler Dybli Stamm – Fasnacht 1976
Bisch au e Dänggmol?
Dänggmoolwirdigs und -unwirdigs
E ganzes Johr lang – gopfridstutz –
Dänggmoolpflääg und Haimetschutz!
Das muess aim jo zem Hals uuslambbe,
So dass De ständig druff duesch drambbe.
Bim Blettli lääse, Färnseh luege
Jagt's Di fascht uus alle Fuege
Vor dänggmoolkultuurelle Forme
Und nostalgyversnobte Norme.
Dänggmool-Wanner, bisch e Köögli
Fillsch Dy Buech mit Nekrolöögli
's Imbergässli wird vo "gsunde"
Architeggte noochempfunde.
Me kittet Riss in alte Schlesser
Und duet mit Sigolin de Resser
Vo Rytter-Statue Make-up mache.
Wär's nit zem Hyle, wär's zem Lache.
Am Minschter syne Sandstai-Frazte
Hän Staimetz läbenslenglig z'gratze.
Theater-Märt – suprema lex –
Uns goht's guet: dr Dügg isch ex
D'Nazi het au Dänggmool gsuecht
Und hindedry d'Idee verfluecht.
Denn drotz dr Jury: Guutzi, Ceppi,
Rysst dä Wettbewärb dr Seppi.
Trotz Giannini und em Cheese
Sin die maischte Vorschleeg mys.
Und drotz Irène, Jan und Greeder
Grootet d'Umfroog under d'Reeder.
's ganz Johr Fasnacht – schregglig! – händer
Mit em -minu-Wandkaländer
D'Basilisgge miesse zrugg
An ihre-n-Ort uff d'Wettstaibrugg.
Und d'Schybe vo dr Charon-Baiz
Haige ganz e bsundere Raiz.
Dr Wolfsgottsagger sott me heege.
Do sin au mir kai Spuur drgeege:
Dert kennt me wirgglig, ganz dief aabe,
Dä Schmonzes-Wettbewärb begraabe.
NZ-Redaggter, ohni z'liege,
Wirsch nur, wenn 's Brevet hesch im Fliege
Dänggmoolwirdigs git's e Huuffe.
Dängget nur an die wo suuffe!
Und au d'Seybi-Attraggzion
Isch e Mumpitz und e Hohn:
Wott Dy Alti nimme spuure,
Stellsch si kiehn uff d'Glaagemuure
Wenn Flohmärt isch und riefsch: "Die wääri
Billig abzgää – Cash and carry!"
Dänggmool, Dänggmool, Dänggmool, Dänggmool
's Granggebliemli suufft halt mänggmool
Dr Papscht het gsait, me derf jetzt nimme.
Und wär's doch miech, dä syg e Schlimme.
Bisch "Homo sapiens", denn hesch Gfell.
Doch ohni "sapiens" kunnsch in d'Hell.
Dä Schildknächt z'Rom het bald der Maage
Und sait: Im Bett muesch Gurte draage.
So goht's aim halt im Schyndoot-Alter.
Do kaasch nur saage: Mein Gott, Walter!
E Nonne maint zem Pater Leo:
In dubioso porno reo
Und kumm an d Fasnacht! Mach e Bsiechli
Am Drummeli ainersyts, im Kiechli.
Und denn am Volkshuus-Charivari,
Däm Anti-Monschter-Larifari.
Und dängg ans Brys-Drummle und -Pfyffe,
Mir maine 's Ueli-Aierschlyffe:
's ainzigi, wo dert het pfiffe,
Isch 's Puublikum gsi. Hesch begriffe?
Wenn's iberflissig isch und gspunne
Und dyr – denn isch's e Fasnachtsbrunne
Mit Pfyfferli und Prässe-Pflänz
Macht au dr Rolli Schnäggedänz.
D'Atlantis-Talk-Show bruucht Moneete:
Dert zahlsch fimf Stutz jetz fir e Fleete.
Au d'Gloore wotti ums Verworge
An jedem Sunntig Burgerzmorge
Mit Gugelhopf und Kaffikanne.
Zem Koche hät's jo dert gnueg Pfanne!
Nur dr Bärnhard kaa ermässe,
Wie dyr's isch, iber Den Haag zfrässe
D'Basler Baizer – quel malheur –
Haisse "Chaîne des Profiteurs".
Si hän immer aim abgrisse
An dr Fasnacht – sag ruehig bschisse –
Und hän abgschepft und hän gwunne.
Doch de Glygge wänn nit gunne
Si dr Käller, 's Fass und d'Deezi.
Wenn's nit Dubel sin, sin's Gleezi.
Wär Schnaps verkauft und Wy und Bier
Isch gaischtig maischtens ebitz stier
Dr Grooss Root, dä syg jetzt am Arsch,
Well d'Spiess aim derte bloost dr Marsch.
Si isch uff kai Fall sehr sensybel
Und spilt ganz gärn 's Enfant terrible.
Si macht dr Lay und au Wild Maa
Und hät gnueg Chromosöömli gha,
Doch darf drotz Schnauz und Heereschnitt
Ans Gryffe-Mähli si halt nit.
Sic transit unsere Mundi
D'Spiess macht die greessere Pfundi
Wenn Scheefer uus dr Mongolay
Granggi Schoof hän, git's e Gschray.
Wenn Bsetzer dien – verdooria –
In Augusta traurica
Mit em Ritschard Schlitte fahre,
Halte si e Naar zem Naare.
So duet's no doo und dert arg dschäddere.
Waas und woo zaigt Dir d'Ladättere.
Am Fasnachts-Zyschdig goht me-n-in dr Halle 8
an d'Ladärne-n-Uusstellig. Si isch vom Nyni
demorge bis am Elfi z'nacht offe.
|
|
