| Ummeblettere |
| Gumbb zeerscht in e Joor! |
|
Basler Dybli Stamm – Fasnacht 1975
Die Arme-n-und die Suuperarme
's het kirzlig ain e Sachbuech gschribe
Und mänggem drin dr Bummi gribe.
Dr Titel haisst ('s git kaini Lyche):
"Die Ryche und die Suuperryche."
Und mir hän gluegt, ob's au drin haig
Basler Nämme uus em Daig.
Mr mache doo nit lang dr Netti:
Es het meh drinne-n-als me wetti.
Im Brichthuus heert me lyseli:
Mir hän im Fyr e Iseli.
E mängge zellt sich zu de Ryche
Wo underem Schuldebärg muess kyche.
Doch isch er nur e niveauloose
Nouveau-riche, wo nit uff Roose
Bettet isch und nur so duet.
Die fähle in däm Buech, dasch guet.
Si sin jo amme numme "in"
Wenn grad Bedrybigsferie sin.
Kummerspägg macht aim nur digger.
Schlanggi Lyt sin Zinslibigger.
So Parvnenü dien rytte, jaage
Und si hän e zwaite Waage.
Biecher kaufe si e kains,
Denn si hän dehaim scho ains.
Ze ihrem glaine Aimoolains
Gheert d'Membership im Valentine's.
Und by de Curler und de Golfer
Do gehn si los wie-n-e Revolver.
Und d'Waggis-Bluuse naiht dr Lämmli:
"Denn ych draag numme Lämmli nämmli!"
Si ässe usswärts immer naime
Wo's e Stärn het und dehaime
Git's nur Glepfer und – well stier –
Statt em Wy e Bächer Bier.
Und d'Dochter isch, y miessti liege,
Nit graad gscheyt, doch lehrt si fliege.
Ze soo aim sait dr Saaresi:
My beschte Root haisst "Spaare Si!"
"Ganz anderscht in Schlaraffia
Läbt unsri Gellert-Maffia.
Inkognito. Kain duet derglyche.
An däm erkennsch die wirgglig Ryche.
Im Stammbaum findsch e Huuffe Ritter.
Die käämte hitte hinter Gitter.
Si hän de Buure d'Zähnte gnoo
Und brennt und graubt und sin esoo
Ze Burg und Ländereye koo.
Und d'Erbe hän das hitte noo.
Denn hän si billig Söldner kauft
Und dyr verhaggt (vom Pfarrer dauft).
Druff aabe Glotz mit Bändel gmacht
Dur Kinderarbet bis in d'Nacht.
Dr Autor isch kai Kommunischt,
Doch schoont er weder Jud no Chrischt.
Znacht goht's Delifon bim Burget.
"Zellsch au Coupons?" frogt dr Furget.
"Druff sin in Root und Zümft ze Ehre
Si koo als ehrewärti Heere,
Sin Oberscht worde-n-und no heecher
Und so bim liebe Gott als neecher.
Hän Gälte gnoo uff Fäld und Matte
Well das duet zinse und duet batte.
Ghyroote hän si ihresglyche.
So wird e Ryche Suuperryche.
Und hitte gheere-n-e die digge
Cheemische-n-und sunscht Fabrigge.
Es wird e jede dolle Boschte
By uns uff wäm ächt syni Koschte(?)
Belegt vo Linietreue, woome
Kennt: "Patrizier, Bonze, Gnoome."
So stoht das in däm Buech, verdeggel.
Und drunder haig's au Lumbbeseggel.
Dr Kechli frogt dr Alioth:
Hesch au so vyli Stitz bygott?
Obwohl Old England 's Libriöm
So schlächt verdaut wie Chewing-Göm,
Rentiere Hoff-Roche meh denn je.
Das kaasch am Pauli Sacher seh.
"Als Pharma-Mozart, ganz und gar,
Und karajähnlig Bille-Zar
Syg är dr Suuperrychscht vom Daig,
Wo Gäld wie ain im Märli haig."
So schrybt dr Holliger, die Dante,
Und är haig uff dr hooche Kante
Drey Milliarde. – Scho isch gwählt,
Wäär me-n-in Basel ginschtig strählt.
Ain uus Tirol, 's goht mr an d'Niere,
Wott unsre Bolle gärn entfiehre.
D' Frau Sacher miecht uff soone Drugg
Bestimmt e baar Picasso lugg.
Scuola Cantorum Basiliänsis
Uff em Scheenebärg, do hänsis.
Do sehsch, was so-n-e Ringier-Dichter
Mobilisiert an Bösewichter.
Es het zwoor d'Schmir dää Typ entdeggt
Und hinder Schloss und Rigel gsteggt.
Doch 's FBI vom Spiegelhoof,
Das luurt uff wytri schwarzi Schoof.
Und muess dr Paul emool uff 's Hysli
Beglaite-n-en zwai Schuugger-Mysli.
In Muusig-Saal kunnsch numme yne
Mit Uuswys und 's het Däller-Myne.
E Drohtverhau wirggt sehr apart.
Im Chor singt d'Sacher-Body-Guard.
Und statt em Menuhin als Star
Gygt dr Färnseh-Kommissar.
Au 's Bläch isch nit ganz stuberain:
Dr Bolizey-Muusig-Verain!
Dr Mentsch läbt nit ellai vom Broot.
Hegschtens e Verwaltigsroot.
Und 's Färnseh, Heftli, Zyttige
Bringe Bricht und Gryttige.
Jetzt waisch: Wär rych isch, isch e-n-Arme,
Und dorum hesch mit ihm Erbarme.
Au wenn dr Holliger die Choose
Erfunde hät: 's Buech blybt e Hausse.
Und wär's sogar nur Quatsch mit Soosse:
Aer duet sich gsund und rych draa stoosse.
Am Fasnachts-Zyschdig goht me-n-in dr Halle 8 an
d'Ladärne-n-Uusstellig. Si isch vom Nyni demorge
bis am Elfi z'nacht offe.
|
|
