| Ummeblettere |
| Gumbb zeerscht in e Joor! |
|
Basler Dybli Stamm – Fasnacht 1971
Gaggoo-Bangg-Gaggoo
Basel isch als Bangge-Blatz
Laider gar nit ebbis Glatts
Well die Spegguulante-Bracht
Allbott in de Fuege gracht.
Jedes Johr macht so-n-e Bänggli
D' Schalter zue: denn het me s Gschänggli.
Und denn haue's d Stitz samt Zinse
D'Schyssgass ab, das haisst: In d'Binse.
Goht e glaini Bangg banggrott,
Kemme glaini Lyt in d'Grott.
Und e mängi Bangg schrybt frehlig
Hinder ihre Name "selig".
Numme well so dummi Sieche
Aagänn wie dr Brinz vo Rieche.
D'Schmir brieft ewig - 's macht aim grangg.
Nimm nur 's Muschter "Fläschebangg".
Das Mool aber duet's glaub batte
Und 's duet alles iberschatte,
Was in Sache "Scandaliensis
Bancus grachus basiliensis"
Je bi uns isch iber d'Bihni.
Stohsch im Drägg bis an dy Kihni
"Salikaliforniän Bängg"
Mit de luusche Ringgeli-Rängg.
Denn die sibe doofe Bosse
Uff de sibe-n-obre Sprosse
Hän mit Gaggoo spegguuliert.
Und dä Gaggoo isch valliert.
Hundertvierzig Millione
Fähle-n-und sin in de Bohne.
Zwai Millione Zänter Gaggoo
Fähle-n-in däm Gaggoo-Sacco.
Jetze bisch, und das isch schitter,
Statt im Country- nur im Zitter-
Club und 's Kriko sait: "Frau Doggter,
Ihre Maa kunnt nimm, jetz hoggt er."
Sibe Gselle-n-ohni Grips
Spinnt me-n-y im "Hotel Lips".
De Bilanz-Analphabeete
Sin d'Moneete gange Fleete.
Ai Verwaltigsroot duet wiete:
"Was bin-n-ych doch fir e Niete!"
's git e Baisse statt e Hausse!
Wenn ain sait, me haig mir groosse
Dschumbbel dur dr Gaggoo zooge,
Isch das wohr und isch nit glooge." -
Simba haisst die armi Moore,
Wo hett Hopf und Schmalz verlore.
's Sparsäuli vom Odermättli
Wär bi aim Hoor iber 's Lättli
Oder iber d'Glinge gsprunge.
Doch dä Star hett denn druff drunge
Und energisch loo verlutte,
Ohni Stitz däät är nimm schutte.
Bref - dr Simba zahlt ergriffe.
Ych hätt dert e-n-Offside pfiffe.
Wie kunnt's au, ass Bangg-Manager
Sich gebärde fascht wie Catcher
Und mit Grämpf wänn Stitz verdiene?
Ohni Stitz sin die halt niene!
Und sie wänn au nid lang warte
Dorum hän si zinggti Karte.
Gwinnsch mit Gaggoo an dr Börse,
Denn hesch Diener, Chaffeur, Nurse.
Zerscht hesch Gomfi und kai Honig.
Mietsch e ganz e glaini Wohnig.
Denne mien's sächs Zimmer sy.
's Aifamiliehuus kunnt gly.
Schliesslig kaufsch e Sitz mit Bad
Plus e Ferie-Chalet z'Gstaad.
Und schlussändlig findsch die Snobe
Imme Lohnhofstibli obe.
Mainsch, die nämme sich dert zämme
Und die dääte sich dert schämme?
Tout au contraire. - Und dr Clou:
Ain git no-n-e Interview!
Je meh Gaggoo as de hesch
Und je dräggiger dy Wesch,
Deschto besser kaasch efange
In dr Zälle d'Präss empfange.
Du und ich, wo ehrbar schaffe,
Sin fir die zwoor dummi Affe.
Unsri Weschte, die sin blanco,
Ihri bruun vom Gaggoo-Manco.
Mir hän weniger vom Lääbe,
Doch mien mir nit Gugge glääbe.
Und si kenne - muesch nit lache ? -
Speeter no ... e Bangg uffmache.
Am Faasnachts-Zyschtig goht me-n-in d'Basler Halle
an d'Ladärne-n-Uusstellig. Si isch vom Nyni demorge
bis am Elfi z'nacht offe.
|
|
