Ummeblettere |
Gumbb zeerscht in e Joor! |
|
Basler Dybli Stamm – Fasnacht 1967
Circus Gloob-Ehr
The Marquis of (Nuudideete-)Bath
Im Earl of Bath sym Eglisee
Het kains e Badglaid aa.
Me dringgt am five o'clock dr Tee
Ganz blutt, ob Frau, ob Maa.
Und d'Lang-n-Erle vo däm Bobby
Isch graaglig voll vo Dier.
Doch 's Vichersammle-n-isch als Hobby,
Wenn Laie fähle, stier.
Sammle Sie au?
Dr Schöllkopf sammlet Autogramm
(Dr Scholer hayg au underschribe),
Und d'Nazi sammlet blaui Dramm.
De Rhypargg-Sammler het me's gribe.
Dr Wääber goht mit "Kuli"-Sprich
Und Haidi-Abel-Schmitzli
Aim mit sym Sammle-n-uff dr Strich.
Fascht wie dä Earl ebitzli.
Addio Africa
Dr Negus z'Aethiopie het
Im Bath sy Sehnsucht gstillt.
Mit Laie, luusch vo A bis Zet,
Het är drey Kischte gfillt.
Am Quatorze Juillet, 's letschti Johr,
Wär's iber Belgie fascht bassore:
Es hät dert d'Blotz-Air by aim Hoor
E "Dart-Herald" verlore.
D'Arche Noah
Wotsch Bandwirm schigge-n-an e Lord,
Hesch Wäntele zem Buggle,
So nimmt das d'Bloog-Air gärn an Bord.
Si duet au Grabstai schmuggle.
Dr Schaller kämt als altbekannte,
Wo kuum sich no ka draie,
In d'Glass fir jungi Elefante.
Im Hegg, do hogge d Laie.
Simba für den Moll
Und so isch also d'Simba-Fracht
Fascht bis uff Brüssel ko.
Doch dno sin d'Gitter hinde gracht
Im Circus Moll & Co.
Dr oberscht boss, dä hät's nid schwär
Bim Fange vo de Laie:
Aer wurd'ne wie de-n-Aggzionär,
Nur Sand in d'Auge straie.
Brüsseler Spitze
Die Vicher sin ins Cockpit fire
Und mache dert e Gheyl.
Dr Co-Pilot stoht an dr Dire
Und fuchtlet mit sym Beyl.
Dr Käpten brielt ins Miggrofoon.
Dr Funggdurm funggt (und macht kai Wangg,
Well si dert maine, 's syg e Flohn):
"So dien die Sieche doch in Tangg!"
Halali
Doch ändlig darf das Flugzyg lande.
Polype, Fyrwehr und - zem Glygg -
D'Armee sin uff dr Pischte gstande.
Und z'hinderscht hinde-n-ain vom "Bligg".
D'Pilote sin dur 's Fänschter gflichtet,
Si hän im Darm e Rysse.
Was jetz kunnt, rymt, wenn's au nit dichtet:
Si hän halt miesse ... uff dr Aabee.
Ruum-Badrullie
Die Kischte "HaBe-A-A-Ha"
Kasch laider jetz nimm pachte.
Si het ebitzli gsaichelet gha
Sit dääne Laie-Frachte.
Dr Moll het drum mit Option
Das Schiff verhaggt und gloobehrgflaggt
Dr schnäll Ruum-Gryzer "Orion",
Bis dert ... e Wildsau ynekakkt.
Nomen est omen
Wenn Flugi-Fritze Keefi fääge
Und Babysitter sin vo Dier,
Dno ka dr Stemmler mynetwääge
Ans Styr vo jed're D-C-4.
Dr Knoorli isch 's Signet vom Knoor;
Dr Blaser het dr Spatz.
Fir d'Gloob-Ehr wär - 's isch laider wohr -
Dr Gloobi rächt am Blatz.
|
|