Ummeblettere |
Gumbb zeerscht in e Joor! |
|
Basler Dybli Stamm – Fasnacht 1966
's Bolizeyfescht
Hermann(dad) Wäber III
D' G r u n d f a r b vo dr Schrooter-Schau,
D' W u n d e r und dr D u n s c h t sind blau.
Aane muess e digg Blakat,
Ins Programmheft e Salat:
"Raiberlis und Bolizischt",
Pseudowisseschaftlig gmischt.
Und am Oobe, das isch glaar,
Bruucht's fir d'Conférence e Star.
Ask dr Männy: "Bisch no frey?"
Aer dritt uff als "Wäber drey".
Judo am Schmirfescht
Statt in Blazer, 's isch enorm,
Stygt är in e-n-Uniform
Vomene Ländsgi, d a s c h e Gääg!
('s kunnt dr Seebel ihm in Wääg.)
Und dno cätscht är, was är cän,
Well si z'Ziri Iebig hän
In Bezug uff Glopf-Ylaag.
's Bellerive broobt das alli Daag
Dert mit jedem wider ney
Underem Diräggter Frei.
D'Bolizey, dy Frind und Hälfer
Denne rapportiert e H u n d
Ooschteraier und dno kunnt
Uff em Trampolin so ain
Uus em Sherlock-Holmes-Verain. -
(F l i e g t e Schugger, ka-n-är gly
Als Artischt zem Circus Knie.)
Und jetzt guehne-n-im Barggett
Dausig Maa: es schwooft 's Ballett.
's ainzig, wo am Oobe fählt:
's wird kai "Reine de Police" gwählt.
Wolle mer se railasse?
D'Scheenhaitskeenigin wär gärn
- Uff de Schebbe mit zwai Stärn -
Samt em Striptease und esoo
Uus em Sektor "Sitte" koh. -
S c h w o o b e, wo wän heeflig sy,
Blose "Z'Basel an mym Rhy".
Und denn kommandiert dr Schulze:
"Schupos, nun 'ne dufte Schnulze!"
Wie-n-e Kääs bisch aabe doo.
Doch zem Gligg isch d'Pause koh.
Mainzer (Spiegel-)Hofsänger
Näbem Drummeli isch 's Bescht
's Monschter-Fasching-Kabbe-Fescht.
Jede kennt vo Dytschland 1
D'Pierrots uus dr Wy-Stadt Mainz.
Die sin sunscht am Färnseh guet.
Doch am Oobe griegsch e Wuet.
Findsch es aifach allerhand,
Ass do 's halbi Schwoobeland
Uff dr Bihni oobestoht
Und 's nur mit "Helau!" schynt's goht.
Aber nit in Rääge koh!
Mit de Stifel an de Schaiche
Und de Birli in de Spaiche
Furze-n-uff dr Zittersau
"Wyssi Myys" im Grais so gnau,
Ass's noo Mäss und Buude riecht.
(Sunscht sin die kai Kircheliecht.)
Und denn stehn mit "Fi-fa-fo! "
(Wyss-Wy-) Fahneschwinger do.
Naime hylt e Korporaal
Wägem Schlussbild "Voici Bâle".
Nyt als Schuugger, hol's dr Guugger!
Alli Flics uus unsrer Stadt
Hogge-n-unde, finde's glatt:
Deggel uus em Hotel Lips,
Plantons mit nur wenig Grips,
Haiptlig - mir hän Stigger säx! -
Und vom Jugedamt e Häx,
Zwanzig vo dr Interpol,
D'Hausesere-n-im Kamisol. -
D'Labbe, die hän sälber baizt;
's Wirtshuus het si immer graizt.
D'Bolänte-n-Expo
Und au d'Basler Halle-n-isch
Weder Altebach no Flisch.
Alles isch ebitzli arm:
Erschti Hilf und Bangg-Alarm;
Uus dr Reemer-Zyt e Schelm;
Plus e blaue Droopehelm;
Gummiknittel, Dräänegas
Und e Spuur vo Gift im Glas. -
Kurz und guet: Dä Schaabernagg
Stroofe mir mit Larvelagg.
Am Zyschdig gohsch an d'Ladärne-n-Uusstellig
in d'Kongrässhalle. Si isch vo demorge-n-am
nyni bis am elfi znacht offe.
|
|