- Vorbereitig uff s' Weekend (Stamm) (29.10.2007)
- Neui cooli Gruppebezeichnige (Stamm) (06.09.2007)
- JG-Weekend...2.1 (20.08.2007)
- JG-Weekend...2.0 (15.08.2007)
- JG-Weekend (20.06.2007)
- Grillplausch (20.06.2007)
- Adiee Obmaa! (01.06.2007)
- Download Brandeburger! (16.04.2007)
- 2007...und los! (19.03.2007)
E Gheimtip für die, wo optimal vorbereitet ins Weekend wänn ko: Uff www.singstargame.com könned Dr Euch scho moll über s' Lieder-Repertoire informiere und entsprächend vorbereite (Täggscht usswändig lehre, Choreographie iistudiere, etc.)...aber mached Euch nit allzu viil Hoffnig im Battle gege dr Singstar-König;-)
Folgendi CD's sin vorhande: "Deutsch Rock-Pop", "80s", "Rocks!", "The Dome", "Legends" und neu: "90's"!
Ah jo...drummle und pfyffe wärde mr denn übrigens au no! Es git diversi Blögg wo mr wärde uff dr Drummle lärme, laufe, Note lehre, schwitze und au no bizeli lüftele.
Und jetzt die einzig wirkligg wichtigi Info vo däm Biitrag: Drummle und Ghöörschutz nit vergässe!
I freu mi uff e glatts Weekend!
Neui cooli Gruppebezeichnige im Stamm
Jojo, nit nur in dr Gschäftswält, nei, jetzt au bi uns in dr Gligge fiehre mr e paar neui, dynamischi, revolutionäri, motivierendi...und völlig verblöödet sinnloosi Bezeichnige für unser Gheimprojäggt yy. Die nit ganz ärnschtznähmende Bezeichnige sin:
NFD = New Force Drums
NFP = New Force Pipes
PFD = Power Force Drums
PFP = Power Force Pipes
Ohni die wahnsinnige Superbezeichnige wäre mr natürligg "niemolls" in dr Laag, das ambitiöse Top Secret-Projäggt z'realisiere;-).
S' Weekend isch verbii, d' Zält wieder verruumt und d' Schloofsägg ussglüftet. Es isch e Super-Event gsi und i glaub, ass es für alli e tolli Erfahrig gsi isch, mit dr Gligge moll könne go zältle...mr dangge im Petrus übrigens no für das Wätterglügg. Bsunders aber möcht ich an dere Stell nomoll dr Pfadi "Ramstei" Dangge saage, ass mir hän dörfe Ihres Material bruche...ohni das wär's nämligg schlicht und eifach nit gange! Merci viilmoll, ass mr au moll hän dörfe Löcher grabe, Füürli mache und ummeschreie;-)
Jetzt isch's sowit, nach dene wättermässig sehr besch...eidene Summerferie gsehn d' Prognose für unseri Dybli-Zält-Stadt gar nit moll sooo schlächt uss! Träffpunggt isch am Samschtig punggt 9i ni dr Schalterhalle vom Bahnhof SBB. Wenn nümme sicher bisch, was muesch mitnäh, git's do nomoll e Flyer mit de wichtigischte Infos:
Mir freue uns alli ganz, ganz fescht uff das spezielle Weekend und hoffe, ass mr die Zält au wirkligg zum Stoh bringe. Grüchtwyys het's jo schiins dr eint oder ander Pfadi drunter, wo au scho moll zältlet het;-)
Es isch wieder sowit: Es goht nümme lang, bis mr wieder ins Iebigs- und Sujetweekend göhn! Wie immer isch's erschte Wuchenänd nach de Summerferie, also am 18. und 19. Auguscht 2007. Das Mol git's e Premiere in dr mittlerwyyle langjöörige Tradition: Mr göhn s'erscht moll go Zältle!!!
Damit au Du kasch an däm Mega-Event derbii si, muesch Di bis am 06. Juli aagmäldet ha! Also huschhusch: Aamäldig ussfülle und dr Nadja oder eim vo Dine Inschtruggdoore schigge...et voilà, scho bisch derbi!
Aabelaade: Infoflyer fürs JG-Weekend
Wie allewyyl um die Zyt isch wieder moll mieses Herbschtwätter, dorum träffe mr uns zu de normale Lektionezytte im Dyblikäller!
Es isch e Grill vorhande, also: Würschtli nit vergässe.
Aabelaade: Infoflyer für dr Grillplausch 2007
Sodeli, jetzt isch's also sowit! Nach 9 Joor het unsere Obmaa, dr Thömi s' Zepter an Claude übergäh. Thömi, i möcht an dere Stell im Name vo allne Dambuure, aber vorallem au ganz persönlig DANGGE saage für die Zyt, wo Du für uns alli in d' Gligge investiert hesch. Es isch nit sälbschtverständligg, ass sich öbber mit sonere Higoob über so langi Zyt um s' Wohl und d' Zuekunft vo dr Gligge kümmeret. Mer dangge Dir für all die unzählige Stunde, wo Du in Sitzige, persönlige Gspröch und Delifoon unermiedlig Di Arbet als Obmaa gmacht hesch. Ass mer hütte bi de Basler Dybli sone tolls, fründschaftligs Klima dörfe gniesse, könne mer nit unwäsentlig Dir verdangge! Mit Dinere ruhige Art, au in hitzigschte Situatione immer z' versueche, e Kompromis für alli Betroffene z'finde, und die persönlige Interässe au moll hindedra z'stelle (einzigi Ussnahm: Die eländiglige Goschdyym-Uffbaute!) hesch Du das vorgläbt, was e guets Vereinslääbe ebbe ussmacht: Toleranz und Reschpäggt au de anders dänggende Gligge-Mitglieder gägenüber!
Thömi, mer wünsche Dir, ass es nit allzu schwer mit em Losloh wird, und ass mer Di no viili, viili Joor bi uns im Stamm dörfe gniesse. Mer sind gspanne, zu was für Forme Du no ufflaufsch, wenn die amtligge Schranke wäg sin;-).
Es isch e tolli Zyt gsi! DANGGE, DANGGE, DANGGE!!!
Und im Claude möcht ich an dere Stell natürlig au alles Gueti für d' Zuekunft wünsche, und ass er dr Muet het, si eigene Wäg z'goh, au wenn das könnt bedüte, ass es Veränderige bi zum Teil liebgwunnene Mödeli wurd gä. E Verein läbt vo Veränderige und neuem Wind!
I freu mi uff die neue Gedangge und Projäggt! Viil Glügg!
Die offizielli Version vo de Drummelnoote zum Brandeburger findsch unter DIVERSES.
Bisch scho gspanne, was Di näggscht "Saison" in de Drummelstunde erwartet??? Muesch Di no e weneli gedulde, bis ass d' Dambuuresitzig umme isch. Denn erfarsch nämligg, uff was Di kasch freue...und uff was villicht au nit.
Bis es denn losgoht wünsch i allne e ruhigi Zyt und freu mi, wenn nach de Oschtere alli wieder motiviert in dr Stund am Bogg stöhn.